Рабийә қадир ханим италийиниң хәлқара әркинлик мукапатиға еришти
Мухбиримиз әқидә
2010.06.18
2010.06.18
RFA Photo / Eqide
Мукапатлаш мурасими италийиниң лука шәһиридә өткүзүлди. Лука шәһири явропадики мәшһур мәдәнийәт мәркәзлириниң бири болуп, дуня уйғур қурултийиниң муавин рәиси өмәр қанат, шәһәрниң әң даңлиқ санмарино мәйданида башлиниш алдида туруватқан мурасимниң нәқ мәйдан әһвалини тонуштурди.
Societa Libera Тәшкилатиниң хадими мария ханим зияритимизни қобул қилип, бу қетимқи мукапатниң рабийә қадир ханимға берилишиниң сәвәблири һәққидә тохталди.
Биз бу қетим тәшкилатимизниң "әркинлик" мукапатини рабийә қадир ханимға тәқдим қилдуқ. Чүнки рабийә қадир ханим еғир сиясий бесим астида яшаватқан хәлқини әркинликкә ериштүрүш үчүн, барлиқ имканийәтлирини ишқа селип кишилик һоқуқ күриши елип бармақта.
Бу мукапат, башқа мукапатлардин пәрқлинидиған алаһидә бир мукапат, шуңа мәзкүр мукапат мана мушундақ һаятини башқиларға беғишлиялайдиған алаһидә инсанларға тәқдим қилиниду, илгири мәзкүр мукапат тибәт хәлқиниң әркинлики, бирма хәлқиниң әркинлики үчүн паалийәт елип барған шуниңдәк кишилик һоқуқ үчүн өзини атиған актип паалийәтчиләргә берилгән иди. Бүгүн рабийә қадир ханим бу мукапат билән тәқдирләнди.
Мукапатниң намидинла ениқ көрүнүп турупту, мукапат "әркинлик" мукапати, демәк рабийә қадир ханим әркинлик үчүн нурғун бәдәл төлиди, рабийә қадир ханим әркинлик үчүн вәтинидин айрилди, рабийә қадир ханим әркинлик үчүн пәрзәнтлиридин айрилди, рабийә қадир ханим әркинлик үчүн мал - дуня, иқтисадидин айрилди, шуңа мән кесип ейталаймәнки, рабийә қадир ханим "әркинлик" намидики барлиқ мукапатларға муйәссәр болушқа лайиқ улуғ бир инсан.
Италийидә рабийә қадир ханим намиға берилгән "әркинлик мукапати" ни, униң кичик қизи қеқинус хеним тапшуруп алди. Societa Libera Тәшкилатиниң хадими мария ханим ейтқандәк, һаятини өз хәлқиниң әркинлики үчүн беғишлиған рабийә қадир ханим шу минутларда немиләрни һес қиливатқанду?
Рабийә қадир ханим бу мунасивәт билән мухбиримизниң зияритини қобул қилип өз һессиятини ипадилиди.
Юқиридики аваз улинишидин, бу һәқтики мәлуматимизниң тәпсилатини аңлайсиләр.