Ramizan munasiwiti bilen istanbuldiki Uyghurlar 'qedir kéchisi' ni birlikte ötküzdi

Qur'an kerimde allahta'ala bu kéchining ehmiyiti we peziliti heqqide mundaq deydu: "biz qur'anni heqiqeten shebi qedride yeni qedir kéchiside nazil qilduq, shebi qedirning néme ikenlikini bilemsen? shebi qedir yeni qedir kéchisi sherep we pezilette ming aydin artuq. Perishtiler we jibri'il shu kéchide perwerdigarining emri bilen zémin'gha allah teqdir qilghan barliq ish üchün chüshidu. Shu kéche tang yorughan'gha qeder pütünley tinch ‏- amanliqtin ibarettur." (Qur'an kerim 97 ‏- süre ).

2009 ‏- Yili 9 ‏- ayning 15 ‏- küni ramizan munasiwiti bilen istanbuldiki Uyghurlardin köp sanda kishi sherqiy türkistan ma'arip we hemkarliq jem'iyitining merkizige yighilip qedir kéchisini birlikte ötküzdi. Bu kéchide Uyghurlar qur'an oqush, jama'etliship namaz ötesh, du'a tilawet qilish, söhbet élip bérish dégen'ge oxshash ibadetler bilen meshghul boldi. Wetende xitayning türmiside yétiwatqan zulum chékiwatqan shéhid bolup ketkenler üchün du'a qildi.

Sherqiy türkistan ma'arip we hemkarliq jem'iyitining merkzide ötküzülgen qedir kéchiside jem'iyet mes'ulliridin ablikimxan mexsum we abdulkerim kuchar qatarliq shexsler söz qilip qedir kéchisi we ramzan éyining Uyghur musulmanlargha bolghan ehmiyiti heqqide toxtaldi.

Sherqiy türkistan ma'arip we hemkarliq jem'iyitining bash naziri ablikimxan mexsum söz qilip, wetende minglighan bigunah kishilerning türmilerde qiyin qistaqta yashawatqanliqini, Uyghur xelqining endishe ichide yashawatqanliqini, emma allahning, chet'elde yashawatqan Uyghurlargha chong németlerni in'am qilghanliqini bu németlerning eng kattiliridin biri bolsa wetendiki qérindashlarning béshigha kelgen ghem ‏- endishilerdin xali ikenlikini shuning üchün gheplettin oyghinip wetendiki qérindashlarning ehwalini chongqur oylinip ular heqqide mulahize yürgüzüsh kéreklikini tekitlidi.

Yuqiridiki awaz ulinishidin, bu heqtiki melumatimizning tepsilatini anglaysiler.