Sérb urush jinayetchisi ratko miladich qolgha élindi

U 2001-yilidin béri ghayib bolup ketken bolup, uning qolgha élinishi xelq'arada adaletning meyli kéyin , meyli baldur bolsun, öz ornini tapidighanliqining ipadisi dep körsitildi.

Bosniyilik sérblarning sabiq herbiy qomandani ratko miladich bosiniye urushi mezgilide sérébrénikadiki 8000 ming bosiniyilik musulman erning qetliy qilinishigha sewebchi bolghan achquchluq qomandan bolup, urush jinayetliri mehkimisi uzundin béri uning iz-dérikini qiliwatqan idi.

Ratko miladich sabiq yugoslawiye armiyisining ofitséri bolup, u sabiq yugoslawiyide parchilinish mezgili bashlan'ghandin kéyin 1991-yili krodiyige ewetilgen. Kéyin u sarayéwodiki yugoslawiye armiyisining ikkinchi herbiy rayon qomandani bolghan. 1992-Yili bosiniye sérb armiyisining bash qomandani qilip békitilgen. 1995-Yili séntebirde sérébnikadiki qirghinchiliq bashlinishtin burun uning sin'gha élin'ghan meshhur sözliri bar bolup, uningda miladich : mana hazir sérébnika shehiride, bu sheherni sérb xelqige hediye süpitide teqdim qilish aldida turuptimiz. Bizning axiri bu musulman bosiniyiliklerdin intiqam alidighan peytimiz yétip keldi, dégen idi.

Ratko miladich 8000 bosiniyilikning ölümidin bashqa yene, bosiniye-géritsigowénaning paytexti sarayéwoning üch yil boyiche qorshaw astigha élinishghimu sewebchi dep qariliwatqan isim. Urushtin kéyin sérbiyige qaytip paytext bélgradta erkin-azade yashighan miladich 2001-yili sabiq yugoslawiyining bashliqi miloshiwich urush jinayetchisi dep qolgha élin'ghandin kéyin ghayib bolghan idi. Emma xelq'ara jama'et bosiniye urush jinayetchilirining qolgha élinishi heqqide bélgradqa toxtimay bésim ishlitip kelgen bolup, hetta yawropa birliki sérbiye eger yawropa birlikige kirimen deydiken, aldi bilen radowan karadich we ratko miladichtin ibaret ikki urush jinayetchisini tépip qolgha élishi kérek, dep shert qoyghan. Gerche, radowan karadich 2008-yili qolgha élin'ghan bolsimu, emma ratko miladéchtin xewer bolmay kelgen idi.

Peyshenbe küni sérbiyining prézidénti boris tadich ratko miladichning 15 yil aridin kéyin qolgha élin'ghanliqini jakarlidi. U “ Biz axiri sérbiye tarixidiki qarangghu bir sehipini axirlashturup, sérblarning yüzidiki qara daghni yughan bolduq” dédi. U yene, néme üchün bu urush jinayetchisining 15 yildin béri iz-dérikining bolmighanliqi heqqidimu ayrim sürüshtürüsh élip baridighanliqini bildürdi.

Xewer tarqalghandin kéyin, xelq'ara jama'et buningdin memnun bolghanliqini ipade qilip, prézidént karadichning jasaritige apirin oqushti. Amérika aqsaraydin bérilgen bayanatta, bu, mushuninggha oxshash bashqa kishilerningmu haman bir küni adaletning soriqigha tartilidighanliqining ipadisi, dep körsetti. Prézidént barak obama buning eyni chaghda qetliy qilin'ghanlarning yéqinlirigha bir teselli bolushini ümid qilidighanliqini bildürdi.
Fransiye prézidénti sarkoziy bolsa buning nahayiti yaxshi bir xewer ikenlikini éytip, prézidént karadichning jasaritini medhiyiligen. Birleshken döletler teshkilatining bash sékrétari ban kimunmu bu heqte söz qilip, bu, xelq'ara adalet üchün tarixi bir kün dep baha bergen.

Gerche miladichning qolgha élinishi xelq'ara jama'etni bolupmu qirghinda ölgenlerning a'ile-tawabatlirini memnun qilghan bolsimu, emma b b s din bérilgen xewerlerdin qarighanda, miladichning qolgha élinishi sérbiyidiki miladichni qehriman dep tonuydighan bezi ziyade milletchi guruppilarning naraziliqini qozghighan. Buninggha qarita naraziliq namayishlirimu yüz bergen.

Miladich qolgha élin'ghandin kéyin, sot da'iriliri bu yil 69 yashqa kirgen miladichning salametlikini tekshürüp, uning ten we zéhin salametlikining jayidiliqini, sotqa tartilsa bolidighanliqini qarar qilghan. Igilinishiche, bélgradtiki sotqa chiqirilghan miladich özining gunahsizliqini éytip, eyibleshni ret qilghan.

Miladich bir hepte ichide gollandiyidiki lahéy urush jinayetliri mehkimisige tapshurup bérilidighan bolup, u mehkimide, arisida kichik balilarmu bolghan 8000 bosiniyilikning sérblar teripidin öltürülüsh weqesidiki achquchluq isim qatarida jinayi jawabkarliqqa tartilidiken.