Беликини кесип наразилиқ ипадилигән рәйһангүл мәтреһимниң бейҗиң вә шаңхәйләрдики кәчүрмишлири

Өткән пәйшәнбә күни шаңхәйдә беликини биритива билән кесип хитай һөкүмитигә наразилиқ билдүргән рәйһангүл мәтреһим, мухбиримизниң зиярити давамида, беликини кесишниң алдида, бейҗиң вә шаңхәйдә бешидин өткәнләр һәққидә мәлумат бәрди. Мәлум болушичә, юрти үрүмчидә үзлүксиз нәзәрбәнд қилиниш, әрз сәпәрлиридә тутуп кетилиш вә әрзигә қулақ селинмаслиқлар уни беликини кесиш арқилиқ диққәт тартиш йолиға мәҗбурлиған.

Үрүмчи полат завутиниң ишчиси рәйһангүл мәтреһимгә 8 йил бойичә иш һәққи кәм берилгән; у 3 йилниң алдида ишидин тохтитилған. Буниң билән икки балиси оқушсиз вә аилиси өйсиз қалған. Үрүмчи полат завути уйғур ели оттура асияға ечиветилгәндин кейин, тез ронақ тапқан карханилардин биридур. Әмма бу ронақ тепиш хитай өлкилиридин техи йеқиндила чиққан хитай көчмәнлиригә завутниң һәшәмәтлик биналирида яшаш вә хизмәт қилиш имкани бәргән болсиму, рәйһангүлгә охшаш бу завутниң аилиликләр қорусида туғулуп өскән уйғур ишчи-хизмәтчиләргә җан сақлаш имканиму бәрмигән.

Юқириқилардин мәлумки, рәйһангүл мәтреһимниң әрз қилиш шәкли өзгичиликкә игә: у әрз давамида һал ейтмиған-дәрт төкмигән; әксичә һәқ-һоқуқлирини баян қилған. У хитай даирилириниң алдиға кәлгәндә йиғлимиған-қахшимиған; әксичә тәңсизлик вә адаләтсизликләрни паш қилған. У сақчилар тутқили кәлгәндә йелинмиған-ялвурмиған, әксичә чаминиң йетишичә күрәш қилған.