Bélikini késip naraziliq ipadiligen reyhan'gül metréhimning béyjing we shangxeylerdiki kechürmishliri

Ötken peyshenbe küni shangxeyde bélikini biritiwa bilen késip xitay hökümitige naraziliq bildürgen reyhan'gül metréhim, muxbirimizning ziyariti dawamida, bélikini késishning aldida, béyjing we shangxeyde béshidin ötkenler heqqide melumat berdi. Melum bolushiche, yurti ürümchide üzlüksiz nezerbend qilinish, erz seperliride tutup kétilish we erzige qulaq sélinmasliqlar uni bélikini késish arqiliq diqqet tartish yoligha mejburlighan.

Ürümchi polat zawutining ishchisi reyhan'gül metréhimge 8 yil boyiche ish heqqi kem bérilgen؛ u 3 yilning aldida ishidin toxtitilghan. Buning bilen ikki balisi oqushsiz we a'ilisi öysiz qalghan. Ürümchi polat zawuti Uyghur éli ottura asiyagha échiwétilgendin kéyin, téz ronaq tapqan karxanilardin biridur. Emma bu ronaq tépish xitay ölkiliridin téxi yéqindila chiqqan xitay köchmenlirige zawutning heshemetlik binalirida yashash we xizmet qilish imkani bergen bolsimu, reyhan'gülge oxshash bu zawutning a'ililikler qorusida tughulup ösken Uyghur ishchi-xizmetchilerge jan saqlash imkanimu bermigen.

Yuqiriqilardin melumki, reyhan'gül metréhimning erz qilish shekli özgichilikke ige: u erz dawamida hal éytmighan-dert tökmigen؛ eksiche heq-hoquqlirini bayan qilghan. U xitay da'irilirining aldigha kelgende yighlimighan-qaxshimighan؛ eksiche tengsizlik we adaletsizliklerni pash qilghan. U saqchilar tutqili kelgende yélinmighan-yalwurmighan, eksiche chamining yétishiche küresh qilghan.