Рәйһангүлниң қолини кесип наразилиқ билдүрүши ширкәт мәсуллириниң позитсийисидә өзгириш пәйда қилди

Полат завутида иш һәққи мәсилисидә миллий тәңсизликкә дуч кәлгән уйғур ишчиларниң сани 1000 дин артуқ; уларниң һәр бириниң өткән 10 йилда тартқан зийини болса 150 миң йүән әтрапида. Әмма буларниң ичидә, өзлириниң зиянкәшликкә учриғанлиқини билгән вә һес қилалиғанлар һәммиси әмәс; өз һәқ-һоқуқини тәләп қилишқа җүрәт қилалиғанлар вә униңдин нәтиҗә қазинишқа ишәнч қилалиғанлар болса наһайити аз. Булардин рәйһангүл мәтреһим, халмурат вә гөлҗәннәт қатарлиқ 3 нәпәр ишчи 3 йилдин бери һәқ-һоқуқлири үчүн күрәш қилмақта.

Рәйһангүл икки һәптә бурун полат завутиниң шаңхәйдики ширкәт бинаси алдида беликини кәскәндин кейин, ширкәт мәсуллириниң позитсийисидә бәлгилик дәриҗидә өзгириш болған. Ширкәт рәйһангүл вә 2 нәпәр сәпдишини ишқа орунлаштурушқа вә бу 3 кишиниң тартқан зийини һесабиға бәлгилик миқдарда пул ярдәм қилишқа вәқәдә бәргән. Әмма рәйһангүл вә сәпдашлири, мәсилиниң бу хил шәкилдә һәл болушиға рази әмәс.

Юқириқи мәлуматлардин қариғанда, рәйһангүл қатарлиқ 3 нәпәр дәвагәрниң мәсилиси асасән һәл болған. Әмма уларниң нөвәттә биарам болуватқини қалған хизмәтдашлириниң йәни 1000 дин артуқ ишсиз қалған уйғур ишчиниң дәхли-тәрузға учриған мәнпәитидур. Улар нөвәттә әнә ашу зиянкәшликкә учриған қериндашлириниң мәнпәити үчүн һәрикәт қилмақта.

Рәйһангүл вә сәпдашлири дава үчүн йолға чиққанда пүтүнләй өз хираҗити биләнла йолға чиққан; завуттики зиянкәшликкә учриған башқа уйғур ишчилар, буларға әрз вә шикайәтлирини һавалә қилғанму әмәс. Пәқәт инсаний мәсулийәт туйғуси вә миллий қериндашлиқ еңила уларниң бу тапшурулмиған вәзипә үчүн әҗир сиңдүрүшигә түрткә болған.