Reyhan'gülning qolini késip naraziliq bildürüshi shirket mes'ullirining pozitsiyiside özgirish peyda qildi

Polat zawutida ish heqqi mesiliside milliy tengsizlikke duch kelgen Uyghur ishchilarning sani 1000 din artuq؛ ularning her birining ötken 10 yilda tartqan ziyini bolsa 150 ming yüen etrapida. Emma bularning ichide, özlirining ziyankeshlikke uchrighanliqini bilgen we hés qilalighanlar hemmisi emes؛ öz heq-hoquqini telep qilishqa jür'et qilalighanlar we uningdin netije qazinishqa ishench qilalighanlar bolsa nahayiti az. Bulardin reyhan'gül metréhim, xalmurat we göljennet qatarliq 3 neper ishchi 3 yildin béri heq-hoquqliri üchün küresh qilmaqta.

Reyhan'gül ikki hepte burun polat zawutining shangxeydiki shirket binasi aldida bélikini keskendin kéyin, shirket mes'ullirining pozitsiyiside belgilik derijide özgirish bolghan. Shirket reyhan'gül we 2 neper sepdishini ishqa orunlashturushqa we bu 3 kishining tartqan ziyini hésabigha belgilik miqdarda pul yardem qilishqa weqede bergen. Emma reyhan'gül we sepdashliri, mesilining bu xil shekilde hel bolushigha razi emes.

Yuqiriqi melumatlardin qarighanda, reyhan'gül qatarliq 3 neper dewagerning mesilisi asasen hel bolghan. Emma ularning nöwette bi'aram boluwatqini qalghan xizmetdashlirining yeni 1000 din artuq ishsiz qalghan Uyghur ishchining dexli-teruzgha uchrighan menpe'itidur. Ular nöwette ene ashu ziyankeshlikke uchrighan qérindashlirining menpe'iti üchün heriket qilmaqta.

Reyhan'gül we sepdashliri dawa üchün yolgha chiqqanda pütünley öz xirajiti bilenla yolgha chiqqan؛ zawuttiki ziyankeshlikke uchrighan bashqa Uyghur ishchilar, bulargha erz we shikayetlirini hawale qilghanmu emes. Peqet insaniy mes'uliyet tuyghusi we milliy qérindashliq éngila ularning bu tapshurulmighan wezipe üchün ejir singdürüshige türtke bolghan.