Роза вә ярдәмсөйәрлик

Мусулманларға һәр йили бир ай роза тутуш ибадити башқиларға ярдәм қилиш вә өзиниң нәпсини контрол қилишни өгиниш мәқсәт қилинған бир ибадәт болуп, роза тутқан адәм ярдәмсөйәрликни өгиниду.
Мухбиримиз өмәрҗан тохти хәвири
2008-09-10
Share

 Сәуди әрәбистаниниң мәккә мукәррәмә шәһридә турушлуқ яш алим абдулетип һаҗим бу һәқтики сөһбитимизни қобул қилған иди.

Абдулетип һаҗим билән сөһбәт

Абдулетип һаҗим розиниң адәмгә башқиларға ярдәм қилишни, йоқсулларниң һалиға йетишни өгитидиған ибадәт икәнликини баян қилип мундақ деди:" роза тутушниң иҗтимаий пайдилириму болуп, роза тутқан киши күндилик йемәк- ичмәклирини һасил қилишқа қадир болалмиған бичариләрниң, йетим- йесир вә йоқсулларниң һалини чүшиниду. Чүнки ачлиқниң дәрдини чәкмигән киши ачлиқниң немә икәнликини билмәйду. У өзи тоқ йүргәнликтин һәммә кишини өзигә охшаш тоқ һес қилиду. Әгәр роза тутуп ачлиқниң азабини тартип көрсә, бу вақитта күнлүк озуқини тапалмиған бичариләрниң һалини чүшиниду-дә, уларниң һаллиридин хәвәр елип, ярдәм қилишни өзи үчүн инсаний бурч дәп билиду. Биравниң һәқиқий мусулманлиқиниң ипадиси униң қәлбиниң юмшақ болуши, өзинила ойлимастин башқиларниму ойлиши, меһир- шәпқәтлик болуши вә кишиләргә көйүмчан болушидур. Аллаһ таала наһайити шәпқәтлик болуп, у пәқәт шәпқәтлик кишиләргила рәһим- шәпқәт қилиду. Пәйғәмбәр әләйһиссалам бу һәқтә мундақ дегән: "шәпқәтлик кишиләргә аллаһ таала рәһим қилиду, йәр йүзидики кишиләргә рәһим - шәпқәт қилиңлар, силәргә асмандики зат(аллаһ таала) рәһим қилиду." Йүсүп әләйһиссалам мисирниң хәзинисигә мәсул болған вақитларда розини көп тутидикән. У бу һәқтә соралғинида: "мән тоқ йүрсәм, пеқирларниң ачлиқини унтуп қелишимдин қорқимән" дегән икән" .

Роза ирадини күчәйтидиған ай

Абдулетип һаҗим йәнә мундақ диди:" рамизан ейи ирадини күчәйтиш вә сәвирчанлиқни үгүниш үчүнму әң яхши пурсәттур. Рози тутқан киши алдида йемәк- ичмәк тәйяр туруп ачлиққа вә уссузлиққа бәрдашлиқ бериду. Уни йейиш, ичиш вә аялиға йеқинчилиқ қилиштин пәқәт униң виҗдани тосап туриду. Чүнки униң йенида назарәт қилидиған аллаһ таала билән виҗданидин башқа һечбир назарәтчи йоқтур. Шуңа германийилик психологийә бир доктори "ирадини тикләш вә күчләндүрүшниң амиллири" намлиқ китабида: "ирадини күчәйтиш үчүн әң яхши амил роза тутуштур" дегән.

"Пәйғәмбәр әләйһиссалам рамизанниң кишигә сәбир үгитидиғанлиқи тоғрилиқ : 'роза тутуш сәбирниң йеримидур' дегән. Чүнки инсанда үч хил күч бар болуп, уларниң биринчиси, нәпсий һәвәс күчи, иккинчиси, йиртқуч һайванларда болидиған ғәзәп күчи, үчинчиси, пәриштиләрдә болғандәк роһий күчтур. Инсанниң роһий күчи юқириқи икки күчни бесип өтәлигәндә у йерим сәбирни һасил қилған болиду. Рамизанда мусулман киши нәпсий һәвисини вә ғәзибини розиниң йүзисидин тәрк етиду. Мана бу, сәбирниң йеримини һасил қилғанлиқ. Өз нәпсиниң һәвәслирини йеңәлмигән киши дуняниң қийинчилиқлирини йеңәлмәйду. Берәр күнлүк ачлиққа чидимиған киши, улуғ нишанларни әмәлгә ашурушқиму чидиялмайду."

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт