Русийә: хитайларниң русийә территорийисидә җуңголуқлар шәһәрчиси қурушиға қәтий йол қоюлмайду

Хитай көчмәнлириниң русийигә бәкму көп аваричиликләрни тепип бериватқанлиқини билдүргән бу әмәлдар, нурғун сандики хитай көчмәнлириниң саяһәтчи салаһийити билән русийигә кәлгәндин кейин, һәр хил қанунсиз йоллар арқилиқ русийә паспортини еливатқанлиқини һәмдә русийә пуқраси нами билән явропа әллиригә оғрилиқчә өтүп кетиватқанлиқини, буниң нәтиҗисидә йеңила базар игиликигә өтүватқан шәрқий явропа әллириниң русийидин келиватқан хитай көчмәнлири еқимини тосуш мәқситидә, русийә паспорти билән чеградин өткән хитайларни русийигә қайтурушқа мәҗбур болуватқанлиқини билдүргән.

Бу русийә әмәлдариниң билдүрүшичә, оттура асия дөләтлиридин келиватқан көчмәнләргә селиштурғанда хитай көчмәнлириниң русийә җәмийитигә сиңип кетиши қийин болғанлиқи һәмдә саниниң көп болғанлиқи сәвәбидин, улар русийиниң һәр қайси шәһәрлиридә топлишип яшаш вә өзлири яшаватқан даиридә америка һәм башқа явропа дөләтлиридикигә охшаш хитай шәһәрчилирини шәкилләндүрүш үчүн русийидә сода қиливатқан хитай ширкәтлири һәр хил амаллар билән йәр сетивелиш, олтурақ биналарни қуруш шундақла бу биналарға пүтүнләй көчмән хитайларни орунлаштуруш ишлирини мәқсәтлик вә пиланлиқ һалда илип бериветипту.

Русийиниң хитай ишлири мутәхәссиси карвилискиниң қаришичә, йеқинқи йиллардин буян бу икки мәмликәтниң мунасивити барғансери йеқинлишиватқан болсиму, бирақ хитай көчмәнлири мәсилиси русийидики һәр қайси тәрәпләр барғансери көңүл бөлүватқан бир мәсилигә айланмақта.

-Әгәр сиз москвадики хитай көчмәнлири тәрипидин нәшр қилиниватқан гезит-журналларни варақлап көрсиңизла, булар москвада қурувалған йәр асти банкиларниң қанчилик көплүкини һәмдә бу көчмәнләрниң русийидә тапқан ақчилирини бу каналлар арқилиқ тохтимастин хитайға йоллаватқанлиқини байқайсиз,‏- дәйду хитай мәсилилири мутәхәссиси карвилиски.

Нөвәттә русийә әмгәк күчлиригә әң еһтияҗлиқ шундақла қанунсиз көчмәнләр әң көп болған дөләтләрниң бири болуп һесаблиниду. Русийә көчмәнләр идарисиниң башлиқи румдановискиниң ашкарилишичә, һазир русийидики йәттә милйонға йеқин қанунсиз көчмәнләрниң йеримидин көпрәкини хитайлар тәшкил қилидикән һәмдә бу сан барғансери көпийиветипту.