Rusiye: xitaylarning rusiye térritoriyiside junggoluqlar sheherchisi qurushigha qet'iy yol qoyulmaydu

“Büyük éra” torining yéqinda bergen xewirige qarighanda, rusiye köchmenler idarisining bashliqi rumdanowiski axbarat tarmaqlirining muxbirlirigha bergen bir qétimliq bayanatida, xitay köchmenlirining xuddi amérika qatarliq döletlerde quruwalghinigha oxshash rusiye térritoriyiside xitay sheherchilirini qurushigha hökümetning qet'iy yol qoymaydighanliqini bildürgen.
Ixtiyariy muxbirimiz azad qasim
2012.11.27
russiye-xitay-kochmen-305.jpg Rusiyidiki xitay köchmenliri rusiye köchmenler idarisi xadimlirigha resmiyetlirini körsetmekte. 2010-Yili 8-noyabir.
RIA Novosti

Xitay köchmenlirining rusiyige bekmu köp awarichiliklerni tépip bériwatqanliqini bildürgen bu emeldar, nurghun sandiki xitay köchmenlirining sayahetchi salahiyiti bilen rusiyige kelgendin kéyin, her xil qanunsiz yollar arqiliq rusiye pasportini éliwatqanliqini hemde rusiye puqrasi nami bilen yawropa ellirige oghriliqche ötüp kétiwatqanliqini, buning netijiside yéngila bazar igilikige ötüwatqan sherqiy yawropa ellirining rusiyidin kéliwatqan xitay köchmenliri éqimini tosush meqsitide, rusiye pasporti bilen chégradin ötken xitaylarni rusiyige qayturushqa mejbur boluwatqanliqini bildürgen.

Bu rusiye emeldarining bildürüshiche, ottura asiya döletliridin kéliwatqan köchmenlerge sélishturghanda xitay köchmenlirining rusiye jem'iyitige singip kétishi qiyin bolghanliqi hemde sanining köp bolghanliqi sewebidin, ular rusiyining her qaysi sheherliride topliship yashash we özliri yashawatqan da'iride amérika hem bashqa yawropa döletliridikige oxshash xitay sheherchilirini shekillendürüsh üchün rusiyide soda qiliwatqan xitay shirketliri her xil amallar bilen yer sétiwélish, olturaq binalarni qurush shundaqla bu binalargha pütünley köchmen xitaylarni orunlashturush ishlirini meqsetlik we pilanliq halda ilip bériwétiptu.

Rusiyining xitay ishliri mutexessisi karwiliskining qarishiche, yéqinqi yillardin buyan bu ikki memliketning munasiwiti barghanséri yéqinlishiwatqan bolsimu, biraq xitay köchmenliri mesilisi rusiyidiki her qaysi terepler barghanséri köngül bölüwatqan bir mesilige aylanmaqta.

-Eger siz moskwadiki xitay köchmenliri teripidin neshr qiliniwatqan gézit-zhurnallarni waraqlap körsingizla, bular moskwada quruwalghan yer asti bankilarning qanchilik köplükini hemde bu köchmenlerning rusiyide tapqan aqchilirini bu kanallar arqiliq toxtimastin xitaygha yollawatqanliqini bayqaysiz,‏- deydu xitay mesililiri mutexessisi karwiliski.

Nöwette rusiye emgek küchlirige eng éhtiyajliq shundaqla qanunsiz köchmenler eng köp bolghan döletlerning biri bolup hésablinidu. Rusiye köchmenler idarisining bashliqi rumdanowiskining ashkarilishiche, hazir rusiyidiki yette milyon'gha yéqin qanunsiz köchmenlerning yérimidin köprekini xitaylar teshkil qilidiken hemde bu san barghanséri köpiyiwétiptu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.