“уйғур санаәтчи вә содигәрләр җәмийити” ниң қурулуши түркийидә ғулғула пәйда қилди

 Уюшминиң www.Uysid.Com Намлиқ торбетиниң баш бетидә бу уюшминиң қурулуш мәқсити һәққидә мунулар йезилған:
Уйғурларниң тунҗи бирдин бир хәлқаралиқ содигәрләр уюшмиси болған уйғур санаәтчи вә содигәрләр җәмийити 2010-йили, сабир боғда башчилиқида бир гуруппа уйғур тәрипидин түркийә вә дунядики уйғур санаәтчи вә содигәрләр үчүн хизмәт қилиш мәқсити билән түркийә җумһурийити истанбул валийлиқиға әнгә алдурулди.

Бу җәмийәтниң хитай баш министири вен җиябавниң түркийигә елип барған зияритидин кейинла қурулуши, бу җәмийәтниң қурғучиси сабир боғда башчилиқидики бир қанчә уйғурниң 10-айниң 9-күни хитай баш министири вен җябав тәрипидин истанбулда қобул қилиниши, һәтта сабир боғда әпәндиниң үрүмчидә нурбәкри билән көрүшүши түркийидики уйғурлар арисида қаттиқ ғулғула пәйда қилмақта.

Түркийидики уйғур дияридин кәлгән бәзи уйғур вә қазақларниң түркийини зиярәт қилған хитай рәһбәрлири билән учришишини вә хитай әлчиликиниң зияпәтлиригә қатнишишини хитай мәтбуатлири чәтәлдики уйғур вә қазақ муһаҗирлар хитай һөкүмитиниң аз санлиқ милләт сияситини қоллап қуввәтлимәктә дәп язмақта.

www.uysid.com

Түркийә дуняда әң көп уйғур, қазақ вә қирғиз көчмән олтурақлашқан дөләтләрдин бири.

5-Июл үрүмчи вәқәсидин кейин хитай һөкүмити түркийигә туғқан йоқлашқа келидиған уйғурларға паспорт беришни тохтатқан болса, түркийидики уйғурларға виза беришниму қийинлаштурди. Бундақ бир пәйттә уйғур санаәтчи вә содигәрләр уюшмиси башлиқи сабир боғданиң хитайниң истанбулда турушлуқ консулханисиға язған хети ашкариланди. Бу хәт бир уйғурға виза берилиши үчүн хитай консулханисиға йезилған болуп, хәттә мундақ дейилгән:
Хитай хәлқ җумһурийитиниң истанбул баш консулиға

Мустафа муһаммәтоғлу уюшмимизниң әзаси. Инисиниң тойиға қатнишиши үчүн хитайға бериши керәк. Буниң үчүн визида асанлиқ яритип беришиңларни илтимас қилимән.

Һөрмәт билән:

Уйғур санаәтчи вә содигәрләр уюшмиси иҗраийә һәйити башлиқи

Сабир боғда

Өткән йили 10-айниң 8-күни түркийидә паалийәт елип бериватқан шәрқий түркистан аммиви тәшкилатлири намайиш өткүзүп хитай һөкүмитиниң уйғурларға йүргүзүватқан бесим сияситигә наразилиқ билдүрүш үчүн түркийидә зиярәттә болуватқан вен җябавға аяғ атса, түркийидики уйғурлардин дилшат уйғур, волқан өзтүрк, шөһрәт дохтур, сабир боғда, зәйнәш исмаил вә мәхмут филиз қатарлиқ кишиләр вен җябав билән көрүшкән. Бу көрүнүш уйғур санаәтчи вә содигәрләр җәмийитиниң тор бетидә елан қилиниши вә сабир боғда әпәндиниң хитай консулханисиға язған хетиниң ашкарилиниши шәрқий түркистан аммиви тәшкилат мәсуллири вә уйғур паалийәтчиләрниң қаттиқ наразилиқини қозғиди. Биз бу һәқтики көз қаришини елиш үчүн түркийидә паалийәт елип бериватқан шәрқий түркистан аммиви тәшкилат мәсуллири вә бәзи паалийәтчиләр билән сөзләштуқ.