“Uyghur sana'etchi we sodigerler jem'iyiti” ning qurulushi türkiyide ghulghula peyda qildi

 Uyushmining www.Uysid.Com Namliq torbétining bash bétide bu uyushmining qurulush meqsiti heqqide munular yézilghan:
Uyghurlarning tunji birdin bir xelq'araliq sodigerler uyushmisi bolghan Uyghur sana'etchi we sodigerler jem'iyiti 2010-yili, sabir boghda bashchiliqida bir guruppa Uyghur teripidin türkiye we dunyadiki Uyghur sana'etchi we sodigerler üchün xizmet qilish meqsiti bilen türkiye jumhuriyiti istanbul waliyliqigha en'ge alduruldi.

Bu jem'iyetning xitay bash ministiri wén jiyabawning türkiyige élip barghan ziyaritidin kéyinla qurulushi, bu jem'iyetning qurghuchisi sabir boghda bashchiliqidiki bir qanche Uyghurning 10-ayning 9-küni xitay bash ministiri wén jyabaw teripidin istanbulda qobul qilinishi, hetta sabir boghda ependining ürümchide nurbekri bilen körüshüshi türkiyidiki Uyghurlar arisida qattiq ghulghula peyda qilmaqta.

Türkiyidiki Uyghur diyaridin kelgen bezi Uyghur we qazaqlarning türkiyini ziyaret qilghan xitay rehberliri bilen uchrishishini we xitay elchilikining ziyapetlirige qatnishishini xitay metbu'atliri chet'eldiki Uyghur we qazaq muhajirlar xitay hökümitining az sanliq millet siyasitini qollap quwwetlimekte dep yazmaqta.

www.uysid.com

Türkiye dunyada eng köp Uyghur, qazaq we qirghiz köchmen olturaqlashqan döletlerdin biri.

5-Iyul ürümchi weqesidin kéyin xitay hökümiti türkiyige tughqan yoqlashqa kélidighan Uyghurlargha pasport bérishni toxtatqan bolsa, türkiyidiki Uyghurlargha wiza bérishnimu qiyinlashturdi. Bundaq bir peytte Uyghur sana'etchi we sodigerler uyushmisi bashliqi sabir boghdaning xitayning istanbulda turushluq konsulxanisigha yazghan xéti ashkarilandi. Bu xet bir Uyghurgha wiza bérilishi üchün xitay konsulxanisigha yézilghan bolup, xette mundaq déyilgen:
Xitay xelq jumhuriyitining istanbul bash konsuligha

Mustafa muhammetoghlu uyushmimizning ezasi. Inisining toyigha qatnishishi üchün xitaygha bérishi kérek. Buning üchün wizida asanliq yaritip bérishinglarni iltimas qilimen.

Hörmet bilen:

Uyghur sana'etchi we sodigerler uyushmisi ijra'iye hey'iti bashliqi

Sabir boghda

Ötken yili 10-ayning 8-küni türkiyide pa'aliyet élip bériwatqan sherqiy türkistan ammiwi teshkilatliri namayish ötküzüp xitay hökümitining Uyghurlargha yürgüzüwatqan bésim siyasitige naraziliq bildürüsh üchün türkiyide ziyarette boluwatqan wén jyabawgha ayagh atsa, türkiyidiki Uyghurlardin dilshat Uyghur, wolqan öztürk, shöhret doxtur, sabir boghda, zeynesh isma'il we mexmut filiz qatarliq kishiler wén jyabaw bilen körüshken. Bu körünüsh Uyghur sana'etchi we sodigerler jem'iyitining tor bétide élan qilinishi we sabir boghda ependining xitay konsulxanisigha yazghan xétining ashkarilinishi sherqiy türkistan ammiwi teshkilat mes'ulliri we Uyghur pa'aliyetchilerning qattiq naraziliqini qozghidi. Biz bu heqtiki köz qarishini élish üchün türkiyide pa'aliyet élip bériwatqan sherqiy türkistan ammiwi teshkilat mes'ulliri we bezi pa'aliyetchiler bilen sözleshtuq.