Saqchining zorawanliqigha uchrighan ana qamaqta, qiz doxturxanida

Saqchi özining tembel bestige we yénidiki qoraligha tayinip turup, güljamalning qoligha koyza sélishnimu béjiridu we uni boysunduridu. Emma saqchining rehimsiz heriketlirige 18 yashliq qizning nazuk téni berdashliq bérelmeydu. Güljamalning qoli béghishidin chiqip kétidu. Nöwette ana qamaqta, qiz doxturxanida. Bu weqe xitayning dölet bayrimi harpisida, Uyghur aptonom rayonluq hökümetning bir xizmet qorusida yüz bergen.

RFA/Shohret Hoshur

Xitayning dölet bayrimining we 18-qurultiyining bixeterlik xizmetliri béyjingdiki Uyghur erzdarlarning béshigha yene derd bolghan. 10 Yildin béri öy-zémin dawasi bilen meshghul boluwatqan aygül toxti xitayning peyzawattiki bir saqchisi teripidin tutup méngilghan. Saqchi aygül toxtini yalap élip méngip ürümchige kelgende bir kün toxtighan.

Aygül toxti bu pursette chala qalghan nopus ishlirini sürüshte qiliwélish üchün aptonom rayonluq hökümetning nopus ishxanisigha yoluqup ötüshni telep qilghan. U saqchilarning nazaritide nopus idarisige barghanda, nopus xadimliri uni chüshtin kéyin kélishke orunlashturghan. Bu sewebtin aygül toxti, saqchilarning peyzawatqa qarap derhal yolgha chiqishini ret qilghan. Aygül toxtining ret qilishini qobul qilalmighan saqchi, uning qoligha koyza sélip, yaqisidin tutqiniche darqiritip sörep élip mangghan. Bu chaghda, 2 yildin béri ürümchide hüner öginiwatqan 18 yashliq güljamal axunjan anisini körüwélish üchün kelgen bolup, u anisining halitini körgendin kéyin saqchigha qarap étilghan. Saqchi anigha qilghan zorawanliqini qizghimu tekrarlighan. Uning qollirini dümbisige qayrip koyza salghan. Saqchi qizning bileklirini ghezep bilen qamallighini we rehimsizlerche tartquchlighini üchün, qizning sol qoli béghishidin chiqip ketken.

Saqchining zorawanliqi nopus ishxanisidiki bashqa xizmetchilernimu zuwan'gha keltürgen؛ ular saqchidin “Siz saqchimu emesmu?” dep sorighan we “Awwal terbiye bérip ekéting, höküm chiqqandin kéyin, andin jazalang” dégen teklipni bergen. Saqchi héch eymenmestinla “Hökümnimu men chiqirimen, testiqnimu men salimen, koyzinimu men salimen” dep jawab bergen. Binaning amanliq xadimi neq meydan'gha yétip kélip ziyankeshlikke uchrighuchigha emes, saqchigha yan basqan.

Aygül toxti we güljamal axunjan bu jeryanda qarshiliqini toxtatmighan. Bu jeryanda saqchining yüzidiki bir kona jarahet qanap ketken, bu ariliqta saqchining ayali yardemge kélip yoldishining yüzini resimge tartqan؛ u, güljamalning béliki we anisining yerde sörep élip méngilghan körünüshini resimge almighan. Netijide aygül toxti peyzawatqa élip kétilip qamaqqa tashlan'ghan. Güljamal doxturxanigha özi bérip qolini tangdurghan. Nöwette ana qamaqta, qiz doxturxanida. A'ile ezaliri aygül toxtini sürüshte qilip barghinida, uning qanunsiz erz qilghanliqini, béyjingdiki merkizi intizam tekshürüsh aldida qalaymiqanchiliq térighanliqini éytqan.

Melum bolushiche, 18 yashliq bir qizgha qol sélishtin xijil bolmighan؛ 50 yashliq bir anini yaqisidin sörep élip méngishtin ikkilenmigen bu kishining ismi bextiyar, ana tili Uyghurche, u xitayning peyzawat nahiyilik saqchi idarisining xadimi.

Yuqiridiki awaz ulinishidin, weqening tepsilatini weqede ziyankeshlikke uchrighan 18 yashliq qiz güljamal axunjanning öz éghizidin anglaysiler.