Сәуди әрәбистанида игилик тиклигән тунҗи бай

Уйғурлар әзәлдин тиришчан бир милләт болғанлиқтин, улар дуняниң һәр қайси җайлириға тарқилип , нурғунлиған қийинчилиқлар вә оңушсизлиқларға учриған болсиму, өзлириниң тиришчанлиқи вә әмгәк сөйәрлики билән барған җайлирида, өзлирини шу җайларниң йәрлик хәлқлиридин қелип қалмайдиған турмуш сәвийисигә чиқиралиған икән.
Мухбиримиз өмәрҗан тохти хәвири
2008.08.21

 Сәуди әрәбистаниға келип йәрлишип қалған уйғурларму әйни вақиттики оңушсизлиқлар вә һәр түрлүк қийинчилиқлар алдида йеңилмәстин, башқа милләтләр алдида, әҗдадлириниң җападин қорқмас роһини испатлиған икән. Абдураһман ақсуму шуларниң қатаридин санилиду.

Муһәммәд қасим һаҗим билән сөһбәт

Муһәммәд қасим һаҗим абдураһман һаҗим ақсуни тонуштуруп мундақ диди: " абдураһман ақсу мәшһур бай абдуғупур һаҗимниң шерики иди. У вәтинимизниң ақсу шәһиридин иди. 1928 - Йилларда ақсуниң айкөл йезисида туғулған болуп, ата - аниси вә бир түркүм йеқинлири билән бирликтә ана юртидин айрилип, сәуди әрәбистаниға келип йәрләшкән икән. Абдураһман һаҗимниң сәуди әрәбистаниға 1931 - йилларниң оттурилирида наһайити кичик яшта кәлгәнлики мәлум. У сәуди әрәбистаниға кәлгәндин кейин мәккә мукәррәм шәһридә олтурақлашқан вә тиҗарәт ишлири билән шуғулланған икән."

Абдураһман ақсуниң паалийәтлири

Муһәммәд қасим һаҗим ейтишичә, 1960 - йилларда сәуди әрәбистанидики мәшһур уйғурлардин қәшқәрлик абдуғупур әмин һаҗим, қәшқәр тоққузақлиқ абдулфәттаһ һаҗим, муһәммәд тохти һаҗим вә абдураһман ақсу қатарлиқ 4 киши җиддә шәһиридә шерик тиҗарәт қилған икән. Уларниң ишлири оңдин келип, 1980 - йилларниң башлирида бу 4 киши сәуди әрәбистанидики әң чоң мәшһур уйғур байлириға айланған икән. Шу вақитта абдураһман ақсу бу шерикликтин айрилмақчи болғинида, қалған үч шерик абдураһман ақсуға 40 милйон риял(10 милйон 666 миң доллар) пулни бөлүп бәргән икән.

Абдуаһман ақсуниң ярдәмсөйәрлики

Муһәммәд қасим һаҗим абдураһман ақсу һәққидә йәнә мундақ диди:" абдураһман ақсу аҗизларға яхшилиқ қилишни сөйидиған вә илим - мәрипәт игилирини һөрмәтләйдиған киши иди. Уйғурларниң ишлириға көңүл бөләтти. Уйғурларға пайдилиқ болған һәр қандақ иш үчүн бир кишилик һәссисини айимайтти. Қоли кәң, сахавәтлик киши болуп, уйғурлардин йетим - йесир вә аҗиз - уруқларға һәмишә ярдәм қолини сунатти. Ана юрттин кәлгән уйғур һаҗиларниң хизмәтлирини қилатти, уларни меһман қилип һал сорайтти. Униң меһман достлуқ хислитини ана вәтәндин кәлгән һаҗилиримизму тәқдирләйтти вә уни махтайтти."

Абдураһман ақсу 1998 - йили рамизан ейида мәккидә 70 яшлар әтрапида вапат болған икән.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.