Сәуди әрәбистандики муһаҗир тәвәккул һаҗим вә униң иш - излири

Чүнки тәвәккул һаҗимниң уйғурларниң җамаәтчилик ишлириға йүрәктин хизмәт қилиштәк хисләтлири һәргиз унтулмайду.

Сәуди әрәбистаниниң мәккә мукәррәмә шәһиридә турушлуқ әһмәд мөмин әпәнди тәвәккул һаҗим һәққидә сөһбитимизни қобул қилған иди.

Әһмәд мөмин билән сөһбәт

Әһмәд мөмин әпәнди тәвәккул һаҗимни тонуштуруп мундақ деди: " тәвәккул һаҗим чәтәлгә йол ечилғандин кейин тунҗи қетим чәтәлгә чиққанлардин бири болуп, сәуди әрәбистандики уйғурларниң мәшһурлиридин вә тепилмайдиған бири иди. Тәвәккул һаҗимниң һаятини бир икки сөз биләнла чүшәндүрүш қийин. Мениң "һәрәмдики мәшһур уйғурлар " дегән мақаләмниң 16 - қисмини оқуғанда тәвәккул һаҗимни тәпсилати билән толуқ билгили болиду . Мән униңда тәвәккул һаҗимни тәпсилий тонуштурған идим."

Тәвәккул һаҗимниң иш - излири

Әһмәд мөмин әпәндиниң ейтишичә, тәвәккул һаҗим 1944 - йили қәшқәр шәһәр ичидә бир содигәр аилисидә дуняға кәлгән икән. 1981 - Йили тәвәккул һаҗимни сәуди әрәбистаниниң җиддә шәһиридики дадиси абдуреһим һаҗим қәшқәрдин көчүрүп елип чиқип, түркийиниң истанбул шәһиригә йәрләштүргән икән. Тәвәккул һаҗим 1985 - йили түркийә пуқралиқиға өткәндин кейин, сәуди әрәбистаниға келип җиддә шәһириниң "баби мәккә" дики дукинида дадиси билән биргә ишлигән. Тәвәккул һаҗимниң истанбулдики4 йиллиқ һаяти асасән түркийә пуқралиқини елиш ишлири билән өткән болуп, бу арида өзиниң иҗтимаий мунасивәт қуруш сәвийисиниң йоқирилиқидин түркийидә бу киши тонумайдиған уйғур йоқ дийәрлик иди. Тәвәккул һаҗим 16 йиллиқ сәуди әрәбистанида туруш һаятида уйғур җамаәтчилики оттурисида хели йүксәк дәриҗидә йүз - аброй тапқан киши иди. Бу, у кишиниң уйғурлар ишиға йүрәктин көңүл бөлидиғанлиқи, уйғурлар ара қарам - қатнаш ишлирида вә уйғур мәсилилиридә актип икәнлики, шундақла иҗтимаий мунасивәтләргә маһир икәнликидин болса керәк. Һәтта сәуди әрәбистаниға 60 - 70 йил бурун келип йәрлишип қалған бәзи уйғурларму тонимиған уйғурларни тәвәккул һаҗимдин сорайдикәнмиш.

Тәвәккул һаҗимниң вапати

Тәвәккул һаҗим дадисидин қалған аяқ сетиш дукинида ишләп йүрүп 2003 - йили 9 - март күни сәуди әрәбистаниниң җиддә шәһиридә 59 йешида меңисигә қан чүшкәнлик сәвәби билән аләмдин өтти.

Юқиридики аваз улинишидин, бу һәқтики мәлуматимизниң тәпсилатини аңлайсиләр.