Sawab uqumi we sawab katigoriyisi

Sawab insanlarning yaxshi emellerni qilishi we ita'etmenliki bilen zich alaqidar bolup, yaxshi emellerni qilishning ölchimi köpinche bu dunyadila ipadilinidu, érishidighan sawabning ölchimi bolsa axirette gewdilinidu.
Muxbirimiz ömerjan toxti
2009-04-06
Share

Mana bu, musulmanchiliq qa'idisidiki chongqur hékmetke bay "yaxshi-yaman" köz qarishi bolup, buningdin körüshke boliduki, musulmanlar qandaqla shara'itta bolmisun, yaxshi ishlarni qilishqa küchlük teshebbus qilin'ghan.

Ana wetenning oxshash bolmighan bilimgahlirida oqushini püttürgendin kéyin, mekke mukerreme shehiride ilmiy xizmetler bilen shughulliniwatqan abdulla hajim iman we uning jem'iyettiki roli heqqidiki söhbitimizni qobul qilghan idi.

Abdulla hajim bilen söhbet

Abdulla hajim sawab mas kélidighan katégoriye heqqide mundaq didi:"musulmanlarning étiqad idiyisidiki sawab köz qarishi, peqet sheri'et mejburiyetlirini üstige alghan, balaghetke yetken musulmanlarghila yeni ijtima'iy iqtidargha ige bolghuchilarghila qaritilghan. Ular sheri'etning her qandaq tekliplirini öz ixtiyarliqi bilen qobul qilalaydu. Shi'unga balaghetke yetmigen balilar üchün sawab-gunah mesilisi mewjud emes. Undaqta, xeyrlik ishlarni qilghan musulman emes kishilermu sawabqa érishemdu? dégen mesile üstide ölimalar ixtilaplashqan. Hekim ibni hizam reziyellahu enhu mundaq dégen:" men peyghember eleyhissalamdin " i allahning resuli! men musulman bolushtin burun méyit yuyush, sediqe bérish, qullarni azad qilish, tughqanlargha yardem qilish qatarliq yaxshi ishlarni qilattim, bu ishlirim üchün sawabqa érishemdimen?"dep soriwidim peyghember eleyhissalam manga:" sen ilgiri qilghan yaxshi ishliring seweblik musulman bolghan" dep jawab berdi". Bu séning burun qilghan yaxshi ishliring seweblik allah sanga hidayet ata qilish arqiliq mukapat bergen, burunqi we musulman bolghiningdin kéyin qilghan emelliring hemmisi qoshulup sanga mensub bolidu, dégenliktur."

Sawabqa érishishning shertliri

Allah ta'ala qur'an kerimde:" kimki zerrichilik yaxshi ish qilidiken, uning mukapatini köridu؛ kimki zerrichilik yaman ish qilidiken, uning jazasini tartidu" dégen. Bu eng asasliq prinsip bolup, allah sawab bérishte kishilerning nesebige, tashqi turuqigha we chiray - sheklige qarap emes, belki qelbige we yaxshi emellirige qarap béridu. Ademni sawabqa érishtürdighan hel qilghuch shert niyettur. Hetta birer yaxshi ishni qilishni oylap könglige pükken bolsimu uni qaysibir seweb bilen emelge ashuralmighan ademgimu allah sawab béridu. Chünki peyghember eleyhissalam :"kimki birer yaxshi ishni qilishni niyet qilsa, uni emelge ashuralmighan bolsimu, uning yaxshi niyiti yüzisidin uninggha sawab yézilidu" dégen. Emma bir yamanliqni qilishqa bel baghlighan bolsimu uni emelge ashurmighan kishige gunah yézilmaydu. Niyet durus we toghra bolmastin qilin'ghan emeller hésabqa élinmaydu. Shunga peyghember eleyhissalam :"emellerning qobul bolishi niyetlerge baghliqtur" dégen.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet