Sekkiz dölet bashliqliri aliy derijilik yighini xitabname élan qildi

Sekkiz dölet bashliqliri aliy derijilik yighini. 2011-Yili 27-may.

Roytrs agéntliqining bayan qilishiche, dunyani yéteklep kétiwatqan sekkiz chong sana'et döliti bashliqliri 5‏-ayning 26‏-künidin bashlap, fransiyning normandi déngiz sahiligha jaylashqan diyuwil aramgahida ikki kün aliy derijilik yighin ötküzgen idi. Bu yighin bügün 27‏-küni xitabname élan qildi. Bu aliy derijilik yighinning xitabnamiside, bu yil ereb dunyasida yüz bergen özgirishlerni, erkinlik we démokratiyining pütün yer sharigha kéngiyiwatqanliqi, bu, dunya tinchliqining daghdam yoli dep körsetti.

Sin'gaporda chiqidighan birleshme seher gézitining bayan qilishiche, amérika, en'gliye, fransiye, italiye, gérmaniye, kanada, yaponiye, rusiyidin ibaret sekkiz chong sana'et döliti bashliqliri fransiyide ikki kün aliy derijilikler yighini ötküzüp, dunyaning yéngi weziyiti, dunya iqtisadi, intérnét we yadro qorallarning bixeterliki , xelq'ara pul-mu'amile teshkilatining bash sahibini teyinlesh mesilisi qatarliq témilarni muzakire qildi. Bu yighin pütün dunyadin, ereb alimidiki özgirishlerge ehmiyet bérishni we apetke uchrighan yaponiyige hésdashliq qilishni telep qildi. Bu aliy derijilik yighin yene liwiye, süriyilerdin xelqni qoralliq basturushni derhal toxtitishni, isra'iliye, pelestinlerdin ehmiyetlik tinchliq söhbiti bashlashni telep qildi.

Xewerde éytilishiche, fransiyide échilghan bu qétimqi sekkiz dölet rehberlirining aliy derijilik uchrishishigha, afriqidiki 17 döletning wekili teklip qilindi. Ular bu yighin échilishtin bir kün burunla hökümet xadimlirigha, shirket xadimlirigha we intérnétni tosuwalghuchilargha cheklime qoyush, bilim hoquqini qoghdash, térrorchiliqqa zerbe bérish jehetlerde keng da'irilik muhakime bashlap pikirde birlikke kélip bolghan idi.

Amérika awazining bayan qilishiche, sekkiz chong sana'et dölitini bashliqliri fransiyide ötküzgen aliy derijilik yighin, démokratik tüzüm tiklesh üchün heriket qiliwatqan ereb döletlirige 40 milyard amérika dolliri yardem bérishni qarar qildi. Bu aliy derijilik yighinning, kazafiy derhal texttin chüshüshi lazim dégen qararini yetküzüshni we elchixanisi arqiliq béjirishni, liwiye mesilisini bir terep qilishta kélishtürgüchilik rolini oynawatqan rusiye prézidénti médéwidéfqa hawale qildi.

Xitay xewer agéntliqining bayan qilishiche, sekkiz chong sana'et döliti bashliqlirining fransiyide ötküzülgen aliy derijilik yighini, bügün nahayiti küp bésimlargha duch kelgen. Uningda éytilishiche, bezi uchur wasitiliri héch yüz xatire qilmastin turup “Sekkiz chong döletning desmayisi ghaltekke chiqip bolghan idi” dep körsetse, yene bezi uchur wasitiliri “Emdi obama sekkiz chong dölet dégenni bikar qiliwétishi kérek” dep körsetken, emma bu xitay géziti, qaysi uchur wasitiliri shundaq dégenlikini ispatlimidi.

Fransiye radi'o istansisining bayan qilishiche, liwiyining bashkenti tripolida, 5‏-ayning 26‏-küni uda besh qétim chong partlash yüz bergendin kéyin, liwiye bash ministiri urush toxtitishni telep qildi. Yawropa -amérika birleshme qisimliri hujumini dawamliq kücheytip, hetta kichik -kichik topqa bölünüp heriket qiliwatqan kazafiy qisimlirigha taqabil turidighan tik uchurlarni orunlashturdi.

Amérika prézidénti obama liwiyining urush toxtitish telipige jawaben, emeliyette kazafiy hazir liwiyining gherbidiki misrata shehirige dawamliq
Hujum qozghawatidu, eger jénini aman qalsun dése, derhal liwéyidin kétishi kérek, uningsiz mesile hel bolmaydu, dégen.