Японийәдә “сенкаку вә окинавани хитайниң тәһдитидин қоғдайли!” намлиқ хәлқаралиқ илмий муһакимә йиғини өткүзүлди

Японийәдә “сенкаку вә окинавани хитайниң тәһдитидин қоғдайли!” намлиқ хәлқаралиқ илмий муһакимә йиғини өткүзүлди. 2012-Йили 17-сентәбир, окинава.

Бу қетимқи хәлқаралиқ муһакимә йиғинини хитайниң тәһдитидин сенкаку вә окинавани қоғдаш паалийити комитети орунлаштурған болуп,ундин башқа окинаваниң әркинликини қоғдаш уюшмиси, хитайниң тәһдитидин балиларни қоғдаш уюшмиси, окинаваниң әркинлики вә тәрәққиятини қоғдаш аяллар уюшмиси вә окинава ислаһат уюшмиси қатарлиқ орунлар мәзкур хәлқаралиқ муһакимә йиғинини қоллап-қувәтлигән. Бу қетимқи муһакимә йиғинида японийә өзини қоғдаш әтритиниң сабиқ һава қисимлири генерали, японийә дөләт мудапиә университетиниң профессори, сабиқ кюшу һава әтритиниң муавин қомандани мотомура әпәнди, дуня уйғур қурултийи тәтқиқат мәркизиниң муавин рәиси, оттура-асия тәтқиқат орниниң мудири турмуһәммәт һашим,моңғул әркинлик иттипақи партийисиниң баш катипи даичин әпәнди вә америкилиқ тарих тәтқиқат оқутқучиси мартен әпәнди қатарлиқ кишиләр өз мақалилирини оқуған. Бундин башқа окинавадики һәр-қайси уюшмиларниң мәсуллириму өз тәтқиқат мақалилирини оқуп өткән. Йиғин җәрянида оттура-асия тәтқиқат орни тәрипидин мәхсус ишләнгән хитайниң уйғурларға елип бериватқан ирқий қирғинчилиқ әһвали тонуштурулған он минутлуқ һөҗҗәтлик филимму көрситилгән. Йиғин окинава өлкисиниң наһа шәһиридики роваҗил меһманханисида өткүзүлгән болуп, чүштин кейин саәт бирдин саәт үчкә қәдәр давалашқан, йиғинға җәмий миңға йеқин киши қатнашқан. Биз бу қетимқи йиғин һәққидә толуқ мәлумат елиш үчүн, мәзкур йиғинға иштирак қиливатқан вә шундақла “хитай компартийиси уйғурларға немә ишларни қилип кәлди?” дегән мақалисини сунған доктор турмуһәммәт һашим әпәнди, японийилик генерал мотумура әпәнди вә моңғул әркинлик иттипақи партийисиниң баш катипи даичин әпәндиләр билән телефон сөһбити елип бардуқ. Улар бүгүнки йиғин һәққидә мәлумат бәрди. юқиридики улиништин тәпсилий әһвални аңлиғайсиләр.