Сәнубәр сәнәт өмики коняда оюн көрсәтти

Җалалидин руминиң қәбриси вә әнәнивий түрк мәдәнийәт пуриқини сақлап қелиши билән, түркийиниң әң қәдимий шәһәрлиридин бири һесаблинидиған коня шәһиридә тоққузинчи нөвәтлик хәлқара мистик музика фестивали өткүзүлди.
Ихтияри мухбиримиз әркин тарим
2012.09.28
senuber-senet-omiki-305.png Сәнубәр сәнәт өмики әзалири түркийәдә
RFA/Erkin Tarim


22 - Сентәбирдин 30 - сентәбиргичә өткүзүлидиған бу музика фестивали 2004 - йилидин бери коня шәһәрлик һөкүмәт тәрипидин оюштурулуп кәлгән болуп, бу қетимқи паалийәт коня шәһәрлик һөкүмәт, сәлчуқ университети, коня шәһәрлик күлтүр - саяһәт башқармиси қатарлиқ органларниң бирлишиши арқилиқ өткүзүлгән. Коня хәлқара мистик музика фестивали дуня мистик музика фестиваллири ичидики әң аммибаб вә чоң типтики фестиваллардин бири һесаблиниду. Фестивалда көргәзмә қилинған музикилар очуқ консерт болуп, беләт тарқитилмайду. Хәлқ аммиси пүтүн дуняниң һәрқайси җайлиридики сәнәткарлар елип кәлгән мистик музикилардин һозурлинип қәдимий түскә игә болған коня шәһиридә худди өзлирини техиму қәдимий чағларға берип қалғандәк һес қилиду.

Тоққузинчи нөвәтлик хәлқара мистик музика фестивалиға или хәлқ нахшилирини вайиға йәткүзүп орунлап әлгә тонулған даңлиқ нахшичи сәнубәр турсун вә сәнубәр турсун сәнәт әтритидики башқа артисларму қатнашти. Сәнубәр турсун сәнәт әтрити сәнубәр турсун, һәсән турсун, һүсән турсун вә миҗит юнуслар тәрипидин қурулған шәхсий сәнәт әтрити болуп, һәсән вә һүсән турсунлар сәнубәрниң қериндиши, миҗит юнус болса шинҗаң сәнәт иниститутиниң оқутқучисидур.

Иран, булғарийә, афғанистан, чех җумһурийити, шәрқий түркистан, гирузийә, һиндистан қатарлиқ дөләтләрдин кәлгән музика әтрәтлири орунлиған мистик музикилар охшашмиған күлтүрләрниң намайәндиси сүпитидә саяһәтчиләр вә йәрлик хәлқни өзигә җәлп қиливалди. Консертлар һәркүни кәч саәт тоққузда җалалидин руми күлтүр мәркизи вә сама залида елип берилди. Болупму, 27 - сентәбир күни сәнубәр музика әтрити тәрипидин сатар, дуттар вә тәмбурлар билән орунланған уйғур муқам музикилири вә сәнубәрниң муңлуқ авази тамашибинларни һаң - таң қалдурди.

27 - Сентәбир күнидики консертқа коня, қәйсәри, истанбул қатарлиқ җайлардин кәлгән уйғурлардин башқа коня хәлқи, түркийиниң башқа шәһәрлиридин кәлгән түрк хәлқи вә башқа дөләтләрдин болуп тәхминән бәш йүздин ошуқ тамашибин қатнашти.

Бу консертни аңлиған, қурбан қудайниң оғли конядики ателла қодай әпәнди консерт һәққидики тәсиратини аңлатти.

Ателла қодай әпәнди сөзидә, түрк хәлқиниң уйғур нахшилирини сөйүп аңлайдиғанлиқидики сәвәб, икки хәлқниң сәнәт мәнбәсиниң бир икәнликини көрситип бәрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.