Мәдинидики мәсчит нәбәвини кеңәйтиш қурулуши башланди

Дунядики мәсчитләрниң ичидин мәккидики мәсчит һәрәм, мәдинидики мәсчит нәбәви вә пәләстиндики мәсчит әқса қатарлиқ үч мәсчит мусулманларниң қәлбидә әң зор орни болған ибадәтгаһлири һесаблиниду.
Ихтиярий мухбиримиз өмәрҗан
2012-09-26
Share
Seudi-padishahi-abdulla-305.jpg Сәуди әрәбистан падишаһи абдулла мәсчит нәбәвиниң кеңәйтилиш қурулушиға ул салмақта. 2012-Йили 25-сентәбир.
RFA/Omerjan

Қатнаш васитилириниң тәрәққий қилиши билән һәрәмгә берип һәҗ қилидиғанларниң сани йилдин-йилға көпийип барғанлиқтин, мәккә вә мәдинидики мәсчит һәрәм билән мәсчит нәбәвигә адәм сиғмайдиған әһваллар көрүлмәктә. Бу сәвәбтин бу икки мәсчитни кеңәйтиш зөрүрийити туғулмақта.

2012-Йили25-сентәбир күни әтигәндә, сәуди әрәбистан падишаһи абдулланиң мәдинә мунәввәрә шәһиридики мәсчит нәбәвини кеңәйтиш қурулуши үчүн ул селиш паалийитигә иштирак қилғанлиқи һәққидики хәвәр сәуди әрәбистанида чиқидиған барлиқ гезитләрдә вә радио-телевизийиләрдә тарқитилған болуп, нөвәттики кеңәйтиш мәсчит нәбәви тарихидики әң чоң қурулуш һесаблинидикән.

Мәсчит нәбәвигә2милйон800миң адәм сиғидиған болмақчи

Мәсчит нәбәвиниң нөвәттики кеңәйтиш қурулуши һәққидики хәвәрләрдә ейтилишичә, мәсчит нәбәвидә бирла вақитта 2 милйон800 миң адәм намаз оқуялайдиған болидикән. Мәсчит нәбәвини шәрқ вә ғәрб һәр икки тәрипидики кеңәйтиш үчүн бу икки тәрәптики җайларни игилиридин сетип елишқа тоғра келидикән. Мәлумки, сәуди әрәбистанида һөкүмәт қурулуши үчүн чеқилидиған өйләр үчүн адәттикидин нәччә һәссә артуқ пул төләп йәр игилирини рази қилидиған қаидә бар. Шуңа һәммә адәм өйиниң һөкүмәт қурулушиға яки йолға кетишини арзу қилиду.

Хәвәрләргә көрә, мәсчит нәбәвиниң шәрқ вә ғәрб икки тәрипидин чеқилидиған өй-имарәт вә дуканларниң игилиригә өтәш үчүн аҗритилған мәбләғ миқдари 25 милйон риял йәни тәхминән 6 милйон 700 миң доллар икән.

Мәсчит нәбәвиниң тарихи

Миладийиниң 622-йили муһәммәд әләйһиссаламниң мәдинә мунәввәрә шәһиригә барғандин кейинки тунҗи иши мәсчит селиш болған. Бу вақитта мәккидин кәлгән муһаҗирлар вә мәдинилик әнсарилар һәммә бир қол болуп, мәдинә мунәввәрә шәһиригә мәсчит селишқа киришкән. Нәтиҗидә, азғинә вақит ичидә бу мәсчит пүтүп чиққан. Мәсчитниң қиблиси пәләстиндики мәсчит әқсаға қарайтти, униң үсти хорма дәрихиниң шахлири билән йепилған, түврүклири хорма яғачлиридин, теги таш билән қопурулған, тамлири хам қишлар билән турғузулған. Шу вақиттики мәсчит нәбәвиниң кәңлики 30 метир, узунлуқи 35 метир болуп чиққан. Үч тәрәптин дәрвазиси бар иди. Мәсчит нәбәви муһәммәд әләйһиссаламниң заманидин башлап һәмишә кеңәйтилип кәлгән. Аввалқи 4 хәлипә, әмәвийләр, аббасийлар, османийлар вә һазирқи сәуди әрәбистани падишаһлиқи тәрипидин кеңәйтип келингән.

Мәсчит нәбәвиниң кеңәйтилиши

Миладийә 1985-йилидин 1993-йилниң ахириғичә давам қилған кеңәйтиштә мәсчит нәбәвиниң омумий йәр мәйдани 165миң квадрат метирға йәткән. Бурун униң һәр бири 72 метир егизликтә 4 мунари бар иди. Униңға йәнә һәр бириниң егизлики 104 метирдин келидиған6 мунарә қошулуп, һазир җәмий 10 мунарә қәд көтүрүп турмақта. Шу күнгә кәлгүчилик мәсчит нәбәвиниң 16 дәрвазиси бар иди. Падишаһ фәһидниң нөвәттики кеңәйтишидә 65 дәрваза йеңидин бекитилип, җәмий 81 дәрваза болған. Мәсчит нәбәвиниң астиға аптомобил тохтитиш орунлири ясалған болуп, униң 8 тәрәптин кириш еғизи бар. Мәсчит нәбәвиниң сиртидики кәң саһәгә аптоматик ечилидиған күнлүкләр ясалған. Мәсчит нәбәвиниң шимал, җәнуб вә шәрқ тәрипигә ясалған мәйданниң омумий йәр мәйдани 135 миң квадрат метир келиду. Мәсчит нәбәвигә 4000 дин көпрәк чирағ бекитилгән. Мәсчит нәбәвиниң астинқи қәвитигә ясалған таһарәтханилириму интайин мукәммәл һәм заманиви шәкилдә ясалған болуп, мәсчити һәрәмниң таһарәтханилиридин нәччә һәссә есил һәм қулай қилип ясалған. Мәсчит нәбәвиниң астинқи қәвитигә ясалған аптомобил тохтитиш орниға електронлуқ лифтләр билән чүшүп чиқилиду. Мәсчити нәбәвиниң әтрапида 560 данә су ичиш турубиси бар.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт