Se'udi erebistan radi'osi türkistan bölümi mukapatqa érishti

Pa'aliyetke se'udi erebistani teshwiqat we medeniyet ministiri, uning mu'awinliri we her derijilik hökümet emeldarliri ishtirak qildi.

Mukapat we teqdirnamige érishkenler ichide türkistan bölümining mudiri muhemmed yüsüpmu bar idi.

Muhemmed yüsüp heqqide qisqiche melumat

Muhemmed yüsüp Uyghur élining xoten wilayitidin bolup, misirdiki ezher uniwérstétining qanun we sheri'et fakultétini püttürgendin kéyin, ottura asiyada hökümet mektipide ereb tilidin mu'ellimlik qilghan.2001 - Yili u se'udi erebistan hökümitining mexsus teklipi bilen se'udi erebistanining jidde shehiridiki dölet radi'osining türkistan bölümide diktor bolup ishleshke bashlighan bolup, 2005 - yilidin bashlap mezkur bölümning mudiri bolghan. Hazirmu shu xizmetni ishlep kéliwatidu. Yene bir tereptin diniy we ijtima'iy mawzularda 20ge yéqin kitab yézip Uyghur xelqini teminlewatidu.

Muhemmed yüsüpning tirishchanliqi bilen türkistan bölümi bashqa chet'eller bölümliri ichide alahide közge körün'gen bölümge aylinip qalghan. Yene uning tirishchanliqi bilen türkistan bölümining anglitishi 2010 - yili1 - féwral künidin bashlap éntérnét torigha qoyulghan. Künlük anglitish tékistliri bilen bille shu künning özide torgha qoyulup bolidu. Tor adrési www.sjrt.org

Bu alahidikilik se'udi erebistan radi'osining bashqa bölümlirining héchiqaysisida yoqtur. Chünki héchqandaq bir radi'o torgha qoyulmighan. Türkistan bölümidikiler aldi bilen hökümetning ruxsitini alghandin kéyin, özlirining tirishchanliqi we meblegh chiqirishi bilen türkistan bölümining tor bétini yasatqan idi. Türkistan bölümining bu utuqini körüp qayil bolghan teshwiqat we medeniyet ministiri öz namidin bölümge teshekkur xéti ewetken. Bashqa mes'ullarmu teshekkurlirini bildürgen. Bu qétimqi mukapatlashmu muhemmed yüsüpning türkistan bölümini tereqqiy qildurush yolida körsetken tirishchanliqliri we sun'ghan programmilirining serxilliqi sewebidin idi.

Türksitan bölümi heqqide qisqiche melumat

Se'udi erebistan radi'osining türkistan bölümi1982ـ yili 3ـ ayning 8ـ künidin itibaren tunji qétim künige bir sa'ettin anglitish bashlighan bolup, 1999 - yiligha kelgende, radi'o anglighuchilarning teklipige asasen, anglitish waqti künige bir sa'ettin ikki sa'etke chiqirilghan. 2007 - Yili dékabirning 13 - künidin étibaren anglitish 3 sa'etke chiqirildi, Uyghurche we özbékche ikki tildiki anglitish waqti ayrilip, ürümchi waqti kech sa'et 9din 10yérimghiche Uyghur tilida, 10yérimdin 12giche özbék tilida bolup kelmekte.

Se'udi erebistan radi'osining türkistan bölümining anglitishi pütun dunya musulmanlirining eqide menbi'i we qibligahi bolghan muqeddes ikki herem zéminidin tarqitilidighanliqi üchün, türkiy tilda sözleydighan xelqlerge qaritilghan muhim anglitish hisablinidu.

Türkistan bölümining anglitishini qisqa dolqun 31 métir 9885 kilugrétista anglashqa bolidu.