Sewrchanliq güzel exlaq

Saqlash, sebir qilish we kütüshler dunya qanuniyiti we ret tertipidur. Mesilen: uruq yerge sélinip bolghuchila ünmeydu. Ünsimu haman hosul bermeydu. Belki ünüp, ösüp yétilip pishqiche kütüshke toghra kélidu. Törelmimu toluq insan bolishi üchün anining qorsiqida bir qanche ay turidu. Waqit dunyadiki her bir heriket we jimliqning kiyimi.
Muxbirimiz ömerjan toxti xewiri
2008-08-11
Share

 Eger biz waqittin halqip chidamsizliq qilsaq, chidimasliqning otida azablan'ghandin bashqa qanuniyet boyiche heriket qilidighan shey'ilerning mahiyitidin héch nersini özgertelmeymiz.

Kirizis küchiyip murekkepleshse, qiyinchiliq éghirliship zulmetlik kéche uzarsa, peqet sebirla insan'gha ganggirashtin qoghdaydighan nur, chüshkünlük we ümidsizliktin qutulduridighan yol ata qilidu. Sebir her qandaq insan din we dunyaliq ishlirida éhtiyajliq bolghan pezilet. Insanning ish - herikiti ümid arzuliri, sebirchanliq we chidam bilen yughurulghan bolishi zörür. Bir hediste:" sebir - chiraqtur" dep kelgen. Chiraq qarangghuni yorutqandek, sebirchanliqmu insanning toxtawsiz algha ilgirilesh yolini yorutup béridu.

Abdulkérim hajim  bilen söhbet

Se'udi erebistanining mekke mukerreme shehiride turushluq  yash alim abdulkérim hajim sebir heqqide toxtulup mundaq dédi:" bu dunya sinaq we imtihan dunyasi bolghanliqtin, insan bashtin kechürgen her bir  sinaq herxil sinaqlar ichidiki bir halqidur. Éghir sinaqlarning seweblirimu yoshurun bolidu.  Shunga insan özini jeng meydanidiki eskerdek her sinaqqa hazir tutushi zörürdur. Kishiler adette sebirdin ibaret heqiqetni ésidin chiqirip qoyup qiyinchiliqqa duch kelgende ganggirap qalidu. Bi'aram bolidu. Insan ongushsizliqqa uchrisa, béshigha éghir künler kelse keng jahan uninggha tariyidu. Künler qiyinlishidu. Shuning bilen ishni tézrek bir terep qilishqa urunidu. Sebirchanliq büyüklükning namayendisi, mukemmellikning belgisi , rohning etraptiki ishlargha rehberlik qilghanliqining delilidur."

Sebirchanliq piship yétilgenlikning alamiti

Abdulkérim hajimning éytishiche, sebirchanliq pishqan erlikning, yüksek baturluqning asasliridin biridur. Hayatliqning sinaqlirigha tutruqsiz  ademler berdashliq bérelmeydu. Adette birawda yötkimekchi bolghan éghir  yük bolsa, u kichik bala, késelchan yaki awaq kishilerni ishletmeydu. Belki küchlük erni tallaydu.

Hayatliqmu shuninggha oxshash bolup, hayatliqning wezipisi hayatliqni bir basquchtin yene bir basquchqa kötürüshni peqet eng chidamliq, sebirchan, pishqan kishilerla üstige alalaydu. Shuning üchün yétekchi we yolbashchilarning sinaq we musheqqetlerdiki nésiwisi bashqilardin köp bolidu.

Nepsining shehwaniy isteklirini peqet sebirla turghuzalaydu

Abdulkérim hajimning éytishiche, adette özi qiziqip ketmeydighan paydiliq ishlarni qilish, qiziqidighan nepsaniyetchiliktin özini tartish peqet sebirchanliq bilenla emelge ashidu. Chünki iradilik kishiler ulughwar ghayini emelge ashurush yolida,  nepsining waqitliq isteklirini sebirchanliqining sayisida qayrip qoyalaydu we yoligha dawam qilidu. Örükni pishishtin burun qéqiwetken baghwen mol hosuldin mehrum qalidu. Shunga " sebir qilsang ghoridin halwa pütidu" dégen hékmet bar.

Insan özini sebir bilen qorallandurup, qiyinchiliqlar aldida temtirep qalmaydighan, menzil yiraq bolsimu  ümidsizlenmeydighan, mes'uliyetchanliq qanchilik éghir bolsimu üstige élishtin qorqmaydighan, iradilik, parasetlik, qiyinchiliqtin kéyin haman ongayliqning, qarangghuluqtin kéyin yoruqluqning bolidighanliqigha ishinidighan ümidwarliq, yiraqni körer, tedbirlik bolishi lazim. 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet