Xitay mu'awin re'isi shi jinpingning türkiye ziyariti Uyghurlarning naraziliq namayishi bilen bashlandi

Namayishqa istanbul we qeyseridin mexsus aptobuslar bilen kelgen Uyghurlar we türklerdin bolup 200 etrapida kishi qatnashti. Shi jinping türkiye jumhuriyitining qurghuchisi mustafa kamal atatürkning xatire sariyigha gül chembirek qoyush üchün méhmanxanidin chiqip, mashinisi bilen yoldin ötüp kétiwatqanda qolida kök bayraq we türkiyining ayyultuzluq bayriqini kötürüwalghan Uyghurlar hem türkler “5-Iyul ürümchi qirghinchiliqini untumaymiz! xitay sherqiy türkistanliqlargha élip bériwatqan bésim siyasitingni toxtat!”, “Ya allah! bismilla allahu ekber!” dégen'ge oxshash sho'arlar astida shi jinpingning resimini yirtish, xitayning qizil bayriqini köydürüsh arqiliq öz naraziliqini bildürüshti.

RFA/Erkin Tarim

Namayish axirida dunya Uyghur qurultiyi mu'awin re'isi séyit tümtürk ependi, sherqiy türkistan medeniyet we hemkarliq jem'iyiti enqere shöbisi bashliqi xeyrullah efendigil ependi, sherqiy türkistan ma'arip we hemkarliq jem'iyiti bashliqi hidayetullah oghuzxan ependi, sherqiy türkistan wexpe mes'ulliridin hafiz qaraqash ependi hem sherqiy türkistan sharlar teshkilati bashliqi turghut bayqal ependiler namayishchilarning aldida turup muxbirlargha bayanat berdi.

Bayanatta xitayning Uyghur diyarida élip bériwatqan bésim siyasiti bayan qilin'ghan. Bir sa'etke yéqin dawamlashqan namayish xitay mu'awin re'isi shi jinpingning méhmanxanidin ayrilishi bilen axirlashti.

Shi jinping enqerede türkiye parlamént bashliqi jémil chéchek we türkiye re'is jumhuri abdullah gül bilen körüshkendin kéyin, bash ministir rejep tayyip erdoghan bilen uchrishish üchün istanbulgha qarap yolgha chiqti.

Xitay mu'awin re'isi shi jinping 2-ayning 22-küni istanbulda ötküzülidighan türkiye-xitay iqtisad munbiri mawzuluq yighin'gha qatnashqandin kéyin türkiyidin ayrilmaqchi.