Уйғур мәсилиси шималий явропа ислам муһакимә мунбиридин орун алди

Йәкшәнбә күнидин тартип стокһолимда давамлишиватқан шималий явропа ислам бирликиниң 32 - нөвәтлик муһакимә йиғинида шәрқий түркистан вә уйғур мәсилиси муһим тема сүпитидә оттуриға чиқти.
Ихтиярий мухбиримиз қутлан
2012.12.25
shimaliy-yawrupa-islam-muhakime-yighini-uyghur-305.png Шималий явропа ислам бирликиниң 32 - нөвәтлик муһакимә йиғинидин бир көрүнүш
RFA/Qutlan


Бу нөвәтлик ислам муһакимә йиғиниға шиветсийә уйғур маарип уюшмисиниң тәшкиллиши билән дуняниң һәрқайси җайлиридин кәлгән уйғур вәкилләр қатнашти. 23 - Декабир (йәкшәнбә) чүштин аввал шиветсийә парламентида уйғур вәкилләр билән мәхсус учришиш паалийити өткүзүлди. Парламент әзаси, йешиллар партийисиниң гуруппа башлиқи мәһмәт қаплан әпәнди шиветсийә парламенти һәмдә “шиветсийә уйғур достлуқ җәмийити” гә вакалитән уйғур вәкилләрни күтивалди. У алди билән башлиниш нутқи сөзләп, шәрқий түркистан вә уйғур мәсилисиниң шиветсийә парламентида оттуриға қоюлуш әһвали шуниңдәк шиветсийә парламентида “шиветсийә уйғур достлуқ җәмийити” ниң қурулуш җәряни вә буниң реал әһмийити тоғрилиқ тәпсилий мәлуматлар бәрди.

Андин түркийә шәрқий түркистан маарип вә һәмкарлиқ җәмийитиниң рәиси абликимхан мәхсум, сәуди әрәбистанидин тәклип қилинған доктор абдулла алим түркистани һәмдә явропа әллиридин кәлгән вәкилләр айрим - айрим сөз қилип, өзлири турушлуқ әлләрдики уйғурларниң әһваллири вә шәрқий түркистан мәсилисиниң нөвәттики йөнилиши һәққидә қарашлирини оттуриға қойди.

Шу күни чүштин кейин шималий явропа ислам бирликиниң 32 - нөвәтлик муһакимә йиғини стокһолим шәһәр мәркизигә җайлашқан оса гимназийисиниң йиғин залида рәсмий башланди. Йиғинниң биринчи күнила сәуди әрәбистанидин тәклип қилинған доктор абдулла алим түркистани шәрқий түркистан вә уйғур мәсилиси һәққидә йиғин әһлигә тәпсилий мәлуматлар аңлитип өтти. У мақалисини башлаштин бурун шиветсийә уйғур маарип уюшмиси тәйярлиған шәрқий түркистан һәққидики 11 минутлуқ мәхсус филим қоюлди һәмдә йиғин әһли арисида чоңқур тәсир қозғиди.

Доктур абдулла алим түркистани өз нутқида шәрқий түркистанниң өтмүши вә һазирқи әһвали, уйғурларниң коммунист хитай ишғалийитидин кейинки ечинишлиқ реаллиқи шундақла ислам дунясиниң уйғур мәсилисини тонушиниң зөрүрлүки қатарлиқ мәсилиләрни аңлатти.

Шималий явропа ислам бирликиниң 32 - нөвәтлик муһакимә йиғини мунасивити билән йиғин мәйданида йәнә көргәзмә тәсис қилинди. Көргәзмә залида уйғурлар үчүн мәхсус орун берилди. Шивәтсийә уйғур маарип уюшмиси бу пурсәттин пайдилинип уйғурларни тонуштуридиған вә уйғур мәсилисини тәшвиқ қилидиған китаб - материялларни көргәзмигә қойди. Бу һәқтә шиветсийә уйғур маарип уюшмисидин абдулла зияритимизни қобул қилип, уйғур темисиниң шималий явропа ислам бирликиниң йиллиқ муһакимә йиғинлирида 4 - қетим оттуриға қоюлуватқанлиқини тәкитлиди.

Үч миңдин артуқ киши қатнашқан бу йиллиқ ислам муһакимә йиғиниға шиветсийә, түркийә, сәуди әрәбистани, финландийә, норвегийә, данийә, голландийә қатарлиқ дөләтләрдин болуп 30 ға йеқин уйғур вәкил қатнашти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.