Shénjén 'sotsiyalizm yaratqan iqtisadiy möjize'mu?

Fransiyining xelq'ara radi'o istansisi bügün bir obzor élan qilip, xu jintawning 'shénjén sotsiyalizm yaratqan iqtisadiy möjize' dégen sözini ret qildi. Töwende, shénjén alahide rayonning 30 yilliqi we buningdin kéyiniki istiqbali heqqide otturigha qoyuluwatqan mulahizilerdin uchur bérimiz.
Muxbirimiz weli
2010-09-07
Share

8‏- Ayning 26‏- küni shénjén iqtisadiy alahide rayon qurulghanliqining 30 yilliq xatire küni idi. Emma xitay bash ministiri wén jyabaw 6 kün burun shénjén'gha bérip, shénjén iqtisadiy alahide rayonning 30 yilliqini xatirilidi. U qilghan sözide, siyasiy islahat élip bérish lazimliqini otturigha qoyghan idi. Xitay re'isi xu jintawning qilghini buninggha téximu oxshimaydu, u shénjén iqtisadiy alahide rayonning 30 yilliqini 12 küni kéchikip xatirilidi, belki shénjén tenterbiye meydanida qilghan sözide 'siyasiy islahat' dégen atalghuni peqet tilgha almidi.

Xelq géziti: shénjénning tereqqiyati sotsiyalizm yaratqan möjize

Xitay kommunist partiyisining orgini 'xelq géziti'ning chet'ellerge tarqitilidighan in'glizche nusxisida bayan qilinishiche, xu jintaw 9‏- ayning 6‏- küni shénjén iqtisadiy alahide rayonining 30 yilliqi munasiwiti bilen qilghan sözide, shénjénni, bir kichikkine béliqchilar mehellisi tereqqi qildurulup, zamaniwi chong sheherge aylandurulghan bir 'iqtisadiy möjize', bu möjize del sotsiyalizm tüzümi we kommunist partiye rehberliki yaratqan möjize dep alahide gewdilendürgen.

Xitayda 1949‏- yilidin burun kapitalning éqishi erkin idi, 1949‏- yilidin kéyin tamamen cheklendi

Fransiye xelq'ara radi'o istansisi bügün élan qilghan obzori arqiliq,xu jintawning sözidiki 'shénjén sotsiyalizm yaratqan iqtisadiy möjize' dégen yekünni teltöküs ret qildi. Li famililik bir shénjén ahalisining sözi bilen éytqanda, xitayda 1949‏- yilidin burun kapitalning éqishi erkin idi. 1949‏- Yilidin kéyin kapitalning erkin éqishi tamamen cheklen'gen.

Hemme gézit 'kapitalizm dozaq' dep teshwiq qiliwatsimu, kapitalistik xongkonggha qéchish toxtimidi

Bu péshqedem shénjén ahalisining éytishiche, shuningdin kéyin, gerche hemme gézit, zhurnal, radi'o 'sotsiyalizm jennet', 'kapitalizm dozaq' dep teshwiq qiliwatsimu, emma xelqning kapitalistik xongkonggha qéchishi toxtimidi. 1979‏- Yili 5‏- ayning 6‏- küni bir kündila shénjén arqiliq xongkonggha qachqan adem sani 30 mingdin ashti. Etisi shénjén bilen xongkong arisidiki 20 nechche kilométirliq déngiz yüzide nahayiti köp adem jesiti leylep qaldi. Mushundaq künlermu bolghan.

Shénjén ahalisi: shénjénni sotsiyalizm emes, kapitalizm tereqqi qildurdi

Bu péshqedem shénjén ahalisining éytishiche, 1980‏- yilidin bashlap, tosuwétilgen yol shénjénda qaytidin échildi, kapital shénjénda erkin aqidighan boldi, shuning bilen shénjén tereqqi qilish pursitige érishti. Déng shawping 1992‏- yili shénjén'gha kelgende, burunqi mesilini 'bizning siyasitimzdiki mesile' dep jakarlidi. Démek, shénjénning iqtisadiy tereqqi qilip, bir kéchik mehellidin bir chong zamaniwi sheherge aylan'ghanliqi sotsiyalizm peyda qilghan 'möjize' emes, u kapitalizm sheklide kapitalning erkin éqishi jeryanida tereqqi qilish pursetlirige ige bolup kélip chiqqan özgirish. Xitayda bashqa jaylarning yillardin buyan shénjéndek tereqqi qilalmighanliqining sewebi, peqet kapitalning erkin éqishi shénjéndikidek yolgha qoyulmighanliqidin bolghan.

Shénjénda 'xu jintawning sözi' deydighan ikki xil tékist bar

Shénjén sheherlik partkom da'imiy ezaliridin melum erbablarning boshün tor gézitige ashkarilishiche, xu jintawning shénjénda qilidighan sözining tékisti xéli burunla kelgen, emma uzun ötmeyla u tékistni qayturuwaldi, kéyin yene bir xilini ewetti. Shundaq qilip shénjénda 'xu jintawning sözi' dégenning ikki xil tékisti bar, burunqisida peqet 'memuri bashqurush tüzümini özgertish' dégen söz bar idi, kéyinkiside umu yoq, wén jyabawning sözidiki 'eger siyasiy islahat élip barmisa, qolgha keltürgen netijilerni saqlap qalghili bolmaydu' dégen mezmunlargha oxshaydighan gep yoq. Buningdin kéyin shénjénni tereqqi qildurush nahayiti qéyin bolidu.

Wén jyabaw bilen xu jintawning shénjénni tereqqi qildurush teshebbusida perq nahayiti chong

Xongkongda chiqidighan 'alma géziti' ning bügünki obzorida bayan qilinishiche, wén jyabaw bilen xu jintawning shénjénni tereqqi qildurush teshebbusida perq nahayiti chong. Xu jintaw shénjénning boynidiki sotsiyalizmning buyunturuqini téximu bek chingitiwetken.

Amérikining shimaliy karolina shitatidiki musteqil yazghuchi ju shöyu'en özining tor gézitide bu heqte élan qilghan obzorida mundaq dep yazidu: stalin öz waqtida xiroshshif peyda bolushining aldini alalmighan. Mawzédungmu déng shawping chiqip xitayda zamanni özgertiwétishidin saqlinip qalalmidi. Xu jintaw hazir wén jyabawning aghzini kontrol qilalmighanliqidin qarighanda, hazir kommunist partiyining ichki qismida ixtilap nahayiti keskin.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet