Шветсарийигә йәрләштүрүлгән ака-укиларниң нөвәттки әһвали

Өткән һәптә гүәнтанамодин қоюп берилип шветсарийигә йәрләштүрүлгән ака-укиларниң нөвәттә шветсарийә һөкүмитиниң ярдими астида шветсарийидә хатирҗәм яшаватқанлиқини илгири сүрүлмәктә.
Мухбиримиз җүмә
2010.03.30
Ababekri-Qasim-Obama-Seybin-305 Қураштурулған бу сүрәткә, президент обама, адвукат сейбин виллет вә абабәкри қасим қатарлиқларниң сүрүтлири чүшүрүлгән.
Асасий сүрәт www.huffingtonpost.com Торидин елинди.

Мәзкур ака ‏- укиларниң илгирики түрмидеши абабәкри қасимниң билдүрүшичә, бу ака ‏- укилар қоюп берилгәндин бери яхши туруветипту.

Гүәнтанамо түрмисидә 8 йерим йилдәк тутуп тутулған ака-ука қериндаш мәһбуслар-әркин вә бәхтияр мәхмут 23 - март шветсарийигә сақ-саламәт кәлди. Улар билән илгири гүәнтанамода биргә ятқан түрмидашлири уларниң һөрлүккә еришкәнликидин бәкму мәмнун болғанлиқини билдүрмәктә.

2006 - Йили гүәнтанамодин қоюп берилип албанийигә йәрләштүрүлгән абабәкри қасим, бу ака-укиларниң нөвәттә бир йүрүш өйгә орунлаштурулғанлиқини, турмушиниң хатирҗәм икәнликини билдүрди.

Бу ака ука- қериндашлар билән сөзлишишкә тиришқан болсақму, шветсарийә һөкүмәт даирилириниң мунасивәтлик тәләплири бойичә улар билән сөзлишишкә имкан болмиди.

Игилишимизчә, әркин вә бәхтияр иккийлән нөвәттә бир йүрүш бина өйдә биргә туридикән. Абабәкри қасимниң билдүрүшичә, бу ака-укилар шветсарийигә чиққандин кейин, албанийә, бермуда вә палав җумһурийитигә йәрләштүрүлгән башқа түрмидашлири биләнму көрүшкән.

Әркин мәхмут вә бәхтияр мәхмут исимлик бу ака-укиларниң шветсарийигә келиштин илгирики кәчмишлири толиму тәсирлик. 2001 - Йили әркин вә бәхтияр айрим- айим һалда пакистан вә афғанистанда тутулуп америка даирилиригә өткүзүп берилгән вә 2002 - йили гүәнтанамоға йөткәлгән.

Мәлум болушичә, 2009 - йили күздә палав һөкүмити гүәнтанамода қелип қалған уйғурларниң һәммисини өз дөлитигә қобул қилишини халайдиғанлиқи, әмма әркин мәхмутни қобул қилалмайдиғанлиқини җакарлиған.

Мәзкур хәвәрни уққан бәхтияр мәхмут, өз акисини гүәнтанамода қоюп палавға беришни рәт қилип акисиға һәмраһ болуп, давамлиқ гүәнтанамода қелишни таллиған. Бу хәвәр ашкариланғандин кейин оқурмәнләрни толиму һаяҗанға салған иди.

2 - Феврал әтигәндә, шветсарийә юра штатлиқ һөкүмәт баянат елан қилип, гүәнтанамодики бәхтияр мәһмут вә әркин мәһмут қатарлиқ ака - ука уйғур мәһбусларни өз штатиға орунлаштуруп кетәләйдиғанлиқини җакарлиди.

3 - Феврал шветсарийә федератсийә кеңиши қара чиқирип, “америкиниң гүәнтанамо түрмисидә бигунаһ һалда йиллап тутуп турулған икки нәпәр хитай пуқраси уйғурни инсанпәрвәрлик вәҗидин қобул қилишини қарар қилдуқ дәп җакарлиған иди.

Бу уйғурлар гүәнтанамода 2001 - йилдин буян қамалған ака - ука мәһбус бәхтияр мәһмут вә әркин мәһмутлар болуп, улар һазир шиветсарийиниң юра өлкисигә җайлашқан мәлум бир бина өйдә биргә яшимақта.

Илгири гүәнтанамоға җәмий 22 нәпәр уйғур қамалған болуп, буларниң 17 нәпири албанийә, бермуда, палав җумһурийити вә шветсарийә қатарлиқ дөләтләргә йәрләштүрүлди. Гәрчә бу уйғурларниң һәммиси қолға елинип узун өтмәй дүшмән җәңчиси әмәс дәп ақлинип қоюп берилишкә һазирланған болсиму, буларни орунлаштуридиған мувапиқ бирәр дөләт чиқмиғачқа йиллап гүәнтанамода йетип кетишкән иди.

Нөвәттә, гүәнтанамода йәнә 5 нәпәр уйғур қоюп берилишини күтүп ятмақта. Бу һәқтә тохталған абабәкри қасим бу уйғурларниңму тезрәк әркинликкә еришишини арзу қилидиғанлиқини билдүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.