Шиветсийә, хитай үчүн җасуслуқ қилған бир уйғурни қолға алди

Шиветсийә бихәтәрлик сақчи тармақлири 6 - айниң 4 - күни хитай үчүн ишпийонлуқ қилди дегән җинайәт билән шиветсийә пуқралиқиға өткән бир уйғурни қолға алди. Бу тасадипи хәвәр шиветисйиниң һәр қайси ахбарат васитлириниң қизиқ ноқтилиқ учуриға айлинип бәс - бәс билән хәвәр қилинди.
Мухбиримиз йалқун
2009.06.08
Share on WhatsApp
Share on WhatsApp

Шиветсийиликләрни һәммидин һәйран қалдурғини, ишпийон гумандариниң шиветсийә пуқраси болғанлиқидур, чүнки шиветсийидә бундин илгириму бундақ ишпийонлуқ җинайити билән әйибләнгәнләр бар болған болсиму, әмма улар дипломатийә хадимлири яки шиветсийидә туруш һоқуқиға иришкән башқа дөләт пуқралири иди.

Бу хәвәр әң дәсләп шиветсийә теливизийиси  4 - қанили тәрипидин тарқитилған болуп, хәвәр тарқитилған шу күни кәчтә шиветсийә баш вәзири фридерик рейинфелт ахбарат вастилириға баянат берип, шиветсийә һөкүмитиниңму бу мәсилигә җиддий қараватқанлиқини билдүрди.

Җинайәт гүмандари қолға елинип шу күнила шиветсийә тәптиш идарисигә тапшурулған болуп, баш тәптишниң ахбарат вастилириға бәргән баянатида, җинайәт гумандариниң җинайи қилимишлириға даир  дәлил - испатлар толуқ болуп, униң җинайити бәзи назук мәсилиләргә четилғанлиқи үчүн һазирчә җинайәт гумандариниң һәқиқий салаһийити һәққидә учур бирәлмәйдикән.

Әмма мухбирлар җинайәт гумандариниң салаһийитиـгә мунасивәтлик бәзи учурларни ахбарат вастилиригә ашкарилиған болуп, җинайәт гумандари һәққидики учурлар төвәндикидәк болған: хитайниң ғәрбий шималидин кәлгән уйғур,  90 - йиларниң ахири шиветсийидә сиясий панаһлиққа иришкән.

2002 -  Йили шиветсийә пуқралиқиға өткән, 61 яш, хитай тилини раван сөзләйду. Баш тәптиш шиветисйә радиосиниң зияритини қубул қилғанда, җинайәт гумандариниң һәрикити ялғуз шиветсийә билән чәкләнмәйдиғанлиқини, бәлки башқа дөләтләр биләнму четишлиқи барлиқини билдүргән. Униң қаришичә, җинайәт гумандари хитай бихәтәрлик тармақлириниң буйруқи буйичә шиветсийидики  уйғур көчмәнләрниң шәхси материялини йәткүзүп биришкә мәсул болған.

Бу  иш ахбарат йүзидә илан қилинғандин кейин, шиветсийидә яшаватқан уйғурлар  бир - биригә телефон қилишип бу һәқтә муназирә қилишқан вә хитай үчүн ишлигән бу уйғурниң  кимлики һәққидә һәр хил пәрәзләрни қилишқан, гәрчә уларниң гумани бир ноқтиға йиғилған болсиму әмма, қанун органлириниң испатлиқ баянати болмиғанлиқи үчүн, җинайәт гумандариниң кимлики һәққидә ениқ бир немә дейишкә петинишиалмиған. Бу һәқтә бир қисим уйғурлар өз һесиятлирини ипадиләшти.

Ахбарат васитилириниң толуқ болмиған учурлириға қариғанда, җинайәт гумандари һәққидики сот мушу айниң  18 - күни ечилидикән, әгәр җинайәт гумандариниң җинайи қилмишлири һәққдики әйибләшләр пут тирәп туралиса  җинайәт гумандари 4 йиллиқ қамақ җазасиға һөкүм қилиниши мумкин икән. Җинайәт гумандари шиветсийә пуқраси болғанлиқи үчүн шиветсийә қануни буйичә хитайға қайтурулуш мумкинчилики наһайити аз икән.

Шиветсийә бихәтәрлик органлириниң билдүришичә, улар җинайәт гумандарини  2008 - йили 1 - айдин башлап из қоғлап тәкшүргән.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.