Shiwétsiyidiki Uyghurlar parlamént binasida iptar ziyapiti berdi

Süret, 9 - ayning 16 - küni shwétsiye uyghur maarip uyushmisining yéshillar partiyisining hemkarliqida shwétsiye parlaméntning nubiska zalida élip barghan iptarliq paaliyitide, shwétsiye parlaméntning muawin bashliqi bérgitta séllén xanim ay yultuzluq kök bayraq we shiwét bayriqi chüshürülgen tortni késiwatqan körünüshi.

Iptar pa'aliyitige shiwétsiye parlaméntining mu'awin bashliqi bérgitta séllén xanim we bir qisim parlamént ezaliridin sirt, shiwétsiyide pa'aliyet élip bériwatqan her qaysi musulman elliri teshkilatlirining wekilliri bolup yüzdin artuq kishi qatnashti. Pa'aliyet iptar üchün éytilghan ezan awazi bilen yüz achti.

Pa'aliyet jeryanida shiwétsiye parlaméntining mu'awin bashliqi bérgitta séllén xanim sözge chiqip shiwétsiyide yashawatqan musulmanlarning jümlidin Uyghur musulmanlirining ramizanini tebriklidi.

Bérgitta séllén xanim sözining axirida ziyaritimizni qobul qilip, Uyghurlar heqqide sorighan so'allirimizgha jawab berdi. U mundaq deydu: "men Uyghurlar heqqide gézitlarda oqughan we téliwizorlarda körgen uchurlardin bashqa köp chüshenchige ige emes idim. Bügün iptar pa'aliytide Uyghurlar bilen biwaste uchriship, temlik her xil tamaqlirini tétip Uyghurlar heqqidiki chüshenchem téximu chongqurlashti. Manga sogha qilin'ghan bu kök sharpa Uyghurlarning bayriqining simwoli iken, men bu soghidin shunchilik xursen boldum. Uyghurlar heqqidiki so'allar tashqi ishlar ministirliqigha da'ir ishlar bolghanliqi üchün, ularning qandaq xizmetlerde boluwatqanliqi manga namelum, emma pat yéqinda shiwétsiyi'e parlaméntida Uyghur mesilisining muzakire qilinidighanliqi manga melum, chünki méning memet qaplan we bashqa bir qism parlamént ezalirining Uyghur mesilisi heqqide parlaméntqa sun'ghan xetliridin xewirim bar."

Iptarliq pa'aliyetni uyushturushqa köp küch chiqarghan shiwétsiye parlaméntining yéshillar partiyisidin bolghan parlamént ezasi memet qaplan iptar ishtirakchilirigha Uyghurlar bügünki künde duch kiliwatqan siyasi, iqtisadi, medeni we diniy jehettiki zulumlarni sözlep ötti we Uyghur tamaqlirini iptar ishtirakchilirigha tepsiliy tonushturdi.

Ziyaritimizni qobul qilghan memet qaplan Uyghur mesilisi heqqide toxtilip mundaq deydu: "Uyghur mesilisi bügünki künde pütün dunya insanliri bilishke tigishlik bir mesile bolsimu, emma xitay hökümitining tetur teshwiqati bilen kishilerning neziridin yiraqta qéliwatidu. Uyghur mesilisi peqet pütün türki milletlerning, pütün musulman dunyasining mesili'isi bolup qalmastin, belki her qandaq wijdan igisining köngül bölüshige tigishlik mesilidur. Emma bügünki künde, dunyadiki nurghun döletler xitayning küchlük iqtisadi küchi aldida Uyghurlarning sherqi tükistandiki öltürülüwatqan, qirghin qiliniwatqan, türmilerge qamiliwatqanliqidek heqiqetlerni körüshke ajizliq qiliwatidu. Biz sherqi türkistandiki bu xil insani bolmighan mu'amililerning baldurraq axirlishishini arzu qilimiz. Uyghurlarning anisi rabiye qadir bu jehette köp tirishchanliqlarni körsitiwatidu. Men shundaq qaraymenki, her bir Uyghurning Uyghur mesilisini dunyagha tonushturush mejburiyiti bar. Uyghur mesilisini shiwétsiye parlaméntida kötürüp chiqishqa men teyyar hem men mushu yolda dawamliq izdiniwatimen."

Pa'aliyet jeryanida Uyghur ma'arip uyushmisining iptar ziyapitini uyushturushqa mes'ul bolghan exmetjan ziyaritimizni qobul qilip iptar ziyapitini orunlashturushqa da'ir ishlardin uchur berdi.

Yuqiridiki awaz ulinishidin, bu heqtiki melumatimizning tepsilatini anglaysiler.