Sherqiy türkistan islam jumhuriyitining dölet mudapi'e ministiri se'udi erebistanida ölgen

Sultanbek se'udi erebistanigha kélip yerleshken we shu jayda wapat bolghan iken. Se'udi erebistanining mekke mukerreme shehiride turushluq ehmed mömin ependi bu heqtiki söhbitimizni qobul qilghan idi.

Ehmed mömin bilen söhbet

Ehmed mömin ependi sultanbek heqqide mundaq dédi:" sultanbek léninning zulmidin qéchip, bizning yurtqa kélip yerleshken we shu waqitning shara'itida bizning xelqqe nisbeten bilimlik hésablinidighan bir bölük özbeklerning qataridin bolup, bu kishi 1933 - yili 12 - ayning 12 - küni qeshqerde qurulghan sherqiy türkistan islam jumhuriyitining mudapi'e ministiri bolghan kishi iken. Kéyinche inqilab meghlub bolghandin kéyin sultanbek bizning yurttin qéchip chiqip se'udi erebistanining ta'if shehirige kélip yerliship qalghan iken."

Sultanbekning se'udi erebistanigha kélishi

Ehmed mömin ependi sultanbekning se'udi erebistanigha kélip yerlishish tarixi heqqide sorighan so'alimizgha jawab bérip mundaq dédi:" sultanbek, musa sheytan, yaqup xoja we bashqilar ning 1936 - yili bizning wetendin qéchip kelgenliki éniq. Chünki shu waqitlarda shingshisey Uyghurlar diyarining hakimiyitini qoligha élip weziyetni tinchlandurghandin kéyin, bir qisim insanlarni öltürüshning shepisi körün'genliki üchün, ularmu eslide chet'eldin kirgen ademler bolghanliqtin, bu yurtta emdi bizge yaxshi kün yoq dégenni perez qiliship shunga chiqip ketken bolishi kérek."

Sultanbekning se'udi erebistandiki hayati

Ehmed möminning éytishiche, sultanbek se'udi erebistanining ta'if shehiridiki öyining mexsus méhmanxanisida hemishe dégüdek Uyghur élidin se'udi erebistanigha panah izdep kélip yerliship qalghan kishilerning ziyaritini qobul qilidiken, ulargha öz waqtidiki milliy inqilab heqqide qissilerni we özi bashtin kechürgen weqeliklerni hayajan bilen qiziqip sözlep béridiken. Her küni dégüdek öyidin ziyaretchi kem bolmaydiken. Éytishlargha asaslan'ghanda, sultanbekning 90 - yillarda ta'if shehiridiki öyide wapat bolghanliqi melum.