Shwétsiyidiki Uyghurlarning türk jem'iyetliri bilen bolghan hemkarliqi emeliy ünüm hasil qilmaqta

16-Yanwar küni kechqurun türkiyining stokholmda turushluq elchixanisida türkiye hökümitining yawropa ittipaqi ishliri mes'uli hemde bash muzakirichi egemen baghish ependining ziyariti munasiwiti bilen mexsus yighilish uyushturulghan. Yighilishqa shwétsiyidiki herqaysi ammiwi türk teshkilatliri teklip qilin'ghan. Shwétsiye Uyghur ma'arip uyushmisining mes'ullirimu alahide teklip bilen bu yighilishqa qatnashqan.

Türk elchixanisining uyushturushi bilen ötküzülgen bu yighilishta türkiyining yawropa ittipaqi bilen bolghan munasiwiti, yawropadiki herqaysi ellerde yashawatqan türk jama'etchilikining ré'al ijtima'iy mesililiri hemde muhajirettiki Uyghur, ezeri we bashqa qérindash türkiy xelqlerning türkiye bilen baghliq ishliri muhakime qilin'ghan.

Shwétsiye Uyghur ma'arip jem'iyitidin exmetjan ependi ziyaritimizni qobul qilip, bu qétimqi yighilishta otturigha chiqqan Uyghurlargha munasiwetlik mesililer heqqide melumat berdi. Exmetjan ependining tekitlishiche, mezkur söhbette mexsus Uyghurlar üchün söz pursiti bérilgen. Shwétsiye hemde yawropaning bashqa elliride yashawatqan Uyghur jama'etchilikining türkiye bilen baghliq ishliri muhakimige qoyulghan. Bolupmu, yawropa elliride téxiche wetendashliq resmiyetliri hel bolmighan Uyghurlarning türkiyige bérip-kélishide wiza mesilisi jehettiki qiyinchiliqliri otturigha qoyulghan. Egemen baghish ependi we türk bash elchisi Uyghurlarning bu türdiki mesililiri heqqide estayidil oylishidighanliqini bildürgen.

Exmetjan ependi yene shwétsiye Uyghur ma'arip uyushmisining yéqinqi yillardin buyan türk jem'iyetliri bilen bolghan qérindashlarche hemkarliqni kücheytishke alahide ehmiyet bergenlikini, buning yawropadiki Uyghur dewasining ongushluq we ünümlük élip bérilishida küch körsitiwatqanliqini alahide tekitlidi.

Tepsilatini yuqiriqi awaz ulinishtin anglighaysiz.