Шивитсйидә уйғур мәдәнийәт күни өткүзүлди

Чәтәлләрдики уйғур тәшкилатлири уйғурларни җүмлидин уйғурларниң миллий давасини өзлири турушлуқ дөләтләрдики аммиға тонуштуруш ишиға әһмийәт берип, бу җәһәттә түрлүк хизмәтләрни ишләп кәлмәктә.
Мухбиримиз ирадә
2012.06.25
Share on WhatsApp
Share on WhatsApp
shiwetsiye-uyghur-mediniyet-kuni-305.png Шивитсйидә өткүзүлгән уйғур мәдәнийәт күнидин бир көрүнүш
uymaarip.com


23 - Июн күни шивитсийә уйғур маарип уюшмиси пайтәхт стокһолимдики тенста районида уйғур мәдәнийәт күни паалийити өткүзүп, уйғурларниң йемәк - ичмәк мәдәнийити, өрп - адәтлири вә тарихини тонуштурған. Җәмийәт башлиқлири бу паалийәт нәтиҗисдә өзлириниң бәлгилик үнүмгә еришкәнликини билдүрмәктә.

Шивитсийә уйғур маарип уюшмиси 2007 - йили шивитсийиниң пайтәхти стокһолимда қурулғандин буян, шивитсийидә яшаватқан уйғур балилирини ана тилда тәрбийиләш, уларға өз миллитиниң өрп - адәтлирини вә динини өгитиш үчүн ана тил мәктипи вә шуниңға охшаш курсларни ачқандин башқа, уйғур вә җүмлидин уйғурларниң миллий давасини шивитсийә хәлқигә тонуш үчүн түрлүк паалийәтләрни уюштуруп кәлмәктә. Бу җәмийәт қурулғанда һәр йили бир қетим уйғур мәдәнийәт күни паалийити өткүзүшни өзиниң низамнамилириниң бири қилип бәлгиләп чиққан болуп, җәмийәт шу низамнамигә асасән бу паалийәтниң көлимини йилдин - йилға зорайитип, мәзмунини йилдин - йилға рәңдарлаштурди.

Уйғур маарип уюшмисиниң бу йиллиқ мәдәнийәт паалийитиниң тәйярлиқ хизмәтлирини уюшма қармиқидики мәһмуд қәшқири ана тил мәктипи өз үстигә елип, 23 - июн күни паалийәтни муваппәқийәтлик һалда өткүзди. Шу күни швитсийиниң пайтәхти стокһолимниң тениста районидики мәдәнийәт мәркизидә ай - юлтузлуқ көк байрақлар ләпилдәп, уйғурларниң йемәк - ичмәк мәдәнийитигә симовуллуқ қилидиған йемәк - ичмәк түрлири, һәр хил тилларда нәшр қилинған китаб, нәшр боюмлири әтраптики кишиләрниң диққитини тартти. Уйғур маарип уюшмиси башлиқи ниҗат әпәнди уйғурларни тонутуш вә һазир уйғур тили вә мәдәнийитиниң хитай һөкүмити тәрипидин йоқитиветилиш хәвпигә дуч келиватқанлиқини шивит җамаәтчиликигә аңлитишни асасий мәқсәт қилған һалда елип берилған бу паалийәтниң арзу қилғандинму бәк нәтиҗилик өткәнликини билдүрди.

23 - Июндики уйғур мәдәнийәт күни паалийити җәмийәт қурулғандин буян өткүзгән 6 - нөвәтлик мәдәнийәт күни болуп, улар йиллардин бериқи тәҗрибиләрни йәкүнләп, бу қетимлиқ паалийәтниң рәңдарлиқини ашурушқа әһмийәт бәргән. Җәмийәтниң муавин башлиқи әхмәтҗан әпәндиниң ейтишичә, бу қетимлиқ паалийәткә иштирак қилғучиларниң сани йиллардикидин көп болған. Болупму әрәб баһарини бешидин кәчүрүватқан дөләтләрдин кәлгән кишиләр уйғур мәсилисгә алаһидә қизиққан.

Һазир чәтәлләрдә яшаватқан уйғурларниң саниниң көпийишигә әгишип, чәтәлләрдә, өз юртлиридин йирақ җайларда чоң болуватқан уйғур пәрзәнтлириниң саниму ешип бармақта. Мана бу уйғур пәрзәнтлирини чәтәлләрдә ярамлиқ бир адәм қилип тәрбийиләп, уларни қатарға қошуш билән бирликтә бу балиларни өз мәдәнийити, өрп - адәтлири бойичә чоң қилиш, уларға ана тилини өгитишму чәтәлләрдики барлиқ уйғур ата - анилар көңүл бөлидиған бир мәсилә. Һазир уйғурлар асаслиқ яшаватқан нурғун дөләтләрдики уйғур җәмийәтлири тәрипидин қурулған ана тил мәктәплири, тил - мәдәнийәт, өрп - адәт курслири дәл мана мушу тәләпни чиқиш қилип қурулған. Шивитисйә уйғур маарип уюшмисиниң башлиқи ниҗат әпәнди юқиридики мәктәп - курслардин сирт, чәтәлләрдә өткүзүлүватқан мәдәнийәт күнлириниң чәтәлликләрни уйғурлардин хәвәрдар қилишла әмәс, бәлки шу уйғур балилириниму өз мәдәнийитидин хәвәрдар қилишта зор рол ойнайдиғанлиқини билдүрди.

Шивитсийә уйғур маарип уюшмиси бундин кийин уйғур мәдәнийәт күни вә шуниңға охшайдиған башқа паалийәтләрни көпләп өткүзүш, шивитсийиниң охшмиған район вә охшиимиған қатламлириға кеңәйтиш вә шуниңдәк шивитсийидики ахбарат вастилири йеқиндин диққәт қилидиған паалийәтләрни уюштуруш пиланлири барлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.