Shiwitsyide Uyghur medeniyet küni ötküzüldi

23 - Iyun küni shiwitsiye Uyghur ma'arip uyushmisi paytext stokholimdiki ténsta rayonida Uyghur medeniyet küni pa'aliyiti ötküzüp, Uyghurlarning yémek - ichmek medeniyiti, örp - adetliri we tarixini tonushturghan. Jem'iyet bashliqliri bu pa'aliyet netijisde özlirining belgilik ünümge érishkenlikini bildürmekte.

Shiwitsiye Uyghur ma'arip uyushmisi 2007 - yili shiwitsiyining paytexti stokholimda qurulghandin buyan, shiwitsiyide yashawatqan Uyghur balilirini ana tilda terbiyilesh, ulargha öz millitining örp - adetlirini we dinini ögitish üchün ana til mektipi we shuninggha oxshash kurslarni achqandin bashqa, Uyghur we jümlidin Uyghurlarning milliy dawasini shiwitsiye xelqige tonush üchün türlük pa'aliyetlerni uyushturup kelmekte. Bu jem'iyet qurulghanda her yili bir qétim Uyghur medeniyet küni pa'aliyiti ötküzüshni özining nizamnamilirining biri qilip belgilep chiqqan bolup, jem'iyet shu nizamnamige asasen bu pa'aliyetning kölimini yildin - yilgha zorayitip, mezmunini yildin - yilgha rengdarlashturdi.

Uyghur ma'arip uyushmisining bu yilliq medeniyet pa'aliyitining teyyarliq xizmetlirini uyushma qarmiqidiki mehmud qeshqiri ana til mektipi öz üstige élip, 23 - iyun küni pa'aliyetni muwappeqiyetlik halda ötküzdi. Shu küni shwitsiyining paytexti stokholimning ténista rayonidiki medeniyet merkizide ay - yultuzluq kök bayraqlar lepildep, Uyghurlarning yémek - ichmek medeniyitige simowulluq qilidighan yémek - ichmek türliri, her xil tillarda neshr qilin'ghan kitab, neshr boyumliri etraptiki kishilerning diqqitini tartti. Uyghur ma'arip uyushmisi bashliqi nijat ependi Uyghurlarni tonutush we hazir Uyghur tili we medeniyitining xitay hökümiti teripidin yoqitiwétilish xewpige duch kéliwatqanliqini shiwit jama'etchilikige anglitishni asasiy meqset qilghan halda élip bérilghan bu pa'aliyetning arzu qilghandinmu bek netijilik ötkenlikini bildürdi.

23 - Iyundiki Uyghur medeniyet küni pa'aliyiti jem'iyet qurulghandin buyan ötküzgen 6 - nöwetlik medeniyet küni bolup, ular yillardin bériqi tejribilerni yekünlep, bu qétimliq pa'aliyetning rengdarliqini ashurushqa ehmiyet bergen. Jem'iyetning mu'awin bashliqi exmetjan ependining éytishiche, bu qétimliq pa'aliyetke ishtirak qilghuchilarning sani yillardikidin köp bolghan. Bolupmu ereb baharini béshidin kechürüwatqan döletlerdin kelgen kishiler Uyghur mesilisge alahide qiziqqan.

Hazir chet'ellerde yashawatqan Uyghurlarning sanining köpiyishige egiship, chet'ellerde, öz yurtliridin yiraq jaylarda chong boluwatqan Uyghur perzentlirining sanimu éship barmaqta. Mana bu Uyghur perzentlirini chet'ellerde yaramliq bir adem qilip terbiyilep, ularni qatargha qoshush bilen birlikte bu balilarni öz medeniyiti, örp - adetliri boyiche chong qilish, ulargha ana tilini ögitishmu chet'ellerdiki barliq Uyghur ata - anilar köngül bölidighan bir mesile. Hazir Uyghurlar asasliq yashawatqan nurghun döletlerdiki Uyghur jem'iyetliri teripidin qurulghan ana til mektepliri, til - medeniyet, örp - adet kursliri del mana mushu telepni chiqish qilip qurulghan. Shiwitisye Uyghur ma'arip uyushmisining bashliqi nijat ependi yuqiridiki mektep - kurslardin sirt, chet'ellerde ötküzülüwatqan medeniyet künlirining chet'elliklerni Uyghurlardin xewerdar qilishla emes, belki shu Uyghur balilirinimu öz medeniyitidin xewerdar qilishta zor rol oynaydighanliqini bildürdi.

Shiwitsiye Uyghur ma'arip uyushmisi bundin kiyin Uyghur medeniyet küni we shuninggha oxshaydighan bashqa pa'aliyetlerni köplep ötküzüsh, shiwitsiyining oxshmighan rayon we oxshi'imighan qatlamlirigha kéngeytish we shuningdek shiwitsiyidiki axbarat wastiliri yéqindin diqqet qilidighan pa'aliyetlerni uyushturush pilanliri barliqini bildürdi.