Сичүәндә апәткә учриған хәлқни қутқузушқа даир йеңи учурлар вә мулаһизиләр

Б б с ниң хәвәр қилишичә, хитай һөкүмити бүгүн 5 ‏ - айниң 23 ‏ - күни елан қилған санлиқ мәлуматларға қариғанда, сичүәндә йүз бәргән йәр тәврәштә 5 милйон 460 миң өй өрүлгән, 6 милйон өй зәхмиләнгән. 55 Миң 740 адәм өлгән, 292 миң 481 адәм яриланған. Техичә из - дерәксиз турған адәм сани 24 миң 960 нәпәр.
Мухбиримиз вәли хәвири
2008.05.23

 Һөкүмәт һазир йәр тәврәшниң дәриҗисини 8 балға өрләтти

Интернеттики әркин муназириләрдә, австралийиниң мелбурен шәһиридин йезилған бир обзорда баян қилинишичә, коммунист хитай һөкүмити дәсләптә сичүәндә йүз бәргән йәр тәврәшниң дәриҗисини 7.6 Балдин 7.8 Балға өрләткән иди. Апәткә учриған хәлқ бу районда һөкүмәт имарәтлири билән хәлқ торалғулириға селинған мәбләғ сани вә ишлитилгән материял сүпити пәрқлиқ болғанлиқи үчүн, йәр тәврәшкә бәрдашлиқ бериш дәриҗиси охшимиған әмәлий пакитларни оттуриға қоюп, һөкүмәткә суал қойғандин кейин, һөкүмәт һазир сичүәндә йүз бәргән йәр тәврәшниң дәриҗисини 8 балға өрләтти. Бу, хитай коммунист һөкүмитиниң 'җуңгода селинған өйләр адәттә 7.8 Бал йәр тәврәшкә бәрдашлиқ берәләйдиған өлчәмдә селинған иди' дәп сәвәб көрситип, мәсулийәттин өзини қачурушни ойлаватқанлиқини билдүриду.

"Йәр тәврәш рәһимсиз, коммунист әмәлдарлири униңдинму рәһимсиз'

Радиомизниң хоңкоңдики мухбири линдиниң апәт йүз бәргән райондин хәвәр қилишичә, мйәняң шәһиридики әншән, бейчуән наһийилиридә %70 хәлқ өйлири вәйран болған. Апәткә учриған хәлқ мухбирларни көргән һаман дәрһал келип йәрлик әмәлдарлар үстидин шикайәт қилған.

70 яшлардики бир бовай мухбиримизға 'бизниң бу җай апәткә еғир дәриҗидә учриған җайларниң бири. Әмма бу җайда йәр тәврәп, өйләр йиқилип, хәлқ амалсиз қелип 3 күн өткәндиму, һөкүмәт әмәлдарлири йәнила 'бу җай апәткә еғир дәриҗидә учриған җай әмәс' дәп хәлқ билән кари болмиди. Партийә гезитлири "йәр тәврәш рәһимсиз, әмма адәм рәһимдил' дәп тәшвиқ қилған иди, хәлқ буниңға "йәр тәврәш рәһимсиз, коммунист әмәлдарлири униңдинму рәһимсиз' дәп җаваб бәрди. Әгәр шу күнләрдә наһийилик партком секритари сиртқа чиққан болса, хәлқниң ғәзипини көрәтти' дегән.

Лоҗаң наһийисидә апәткә учриған хәлқ намайиш қилди

Хоңкоңда чиқидиған 'миңпав' гезитиниң хәвәр қилишичә, , 5 ‏ - айниң 23 ‏ - күни, апәткә учриған районларниң бири болған деяң шәһириниң лоҗаң наһийисидә, апәткә учриған хәлққә ярдәм қилинған йемәклик қачиланған бир аптомобил келип тохтиған һаман, бәлгиси йоқ бир һәрбий пикап келип йемәклик қачилашқа башлиған.

Улар өзини наһийилик қораллиқ бөлүм хадимлири дәп тонуштурғанда, хәлқ уларға нарази болған болсиму, әмма улар сақчиларниң һемайиси астида алидиғанни елип кәтмәкчи болған. Бу чағда қалаймиқанчилиқ чиқип, қалаймиқанчилиқ намайишқа айланған. Хәлқ сақчи машинисидин бирни пачақлиған. Сақчилар қечип һөкүмәт бинасиға киривалған.

Хәлқ вәзиписини ада қилмиған әмәлдарни җазалашни вә төләм берилишни тәләп қилмақта

'Көзитиш журнили'ниң бүгүнки санида, ву шуәнсән әпәнди сичуәндики йәр тәврәштә йиқилған мәктәп вә өлгән оқуғучилар һәққидики санлиқ мәлуматларни елан қилди. Униң ейтишичә, бу қетимқи йәр тәврәштә, мйәняң шәһиридики хәняң балилар бағчисида 1700 кичик бала көмүлүп өлгән.

Вуду маарип мәркизидә көмүлүп қалған 700 нәпәр оқутқучи вә оқуғучидин аран 5 и қутқузивелинған. Чуәнбей оттура мәктәптә 2000 оқуғучидин 1000 и көмүлүп өлгән. Шифаң шәһиридә 447 оқуғучи өлгән, 2673 оқуғучи яриланған.

Бу районда апәткә учриған хәлқ һазир, бу қетимқи апәт пәқәт хәлққила келип, һөкүмәт әмәлдарлириға кәлмигәнликидин ибарәт пакитқа асасән, өзиниң вәзиписини ада қилмиған әмәлдарни җазалашни вә төләм берилишни тәләп қилмақта.

"Җуңго балилири болмаңлар"

Бүгүн мәзкур журналда мақалә елан қилған гу юән әпәндиниң баян қилишичә, хитай хәлқ җумһурийитидики яш өсмүрләр туғулуштин бурунла һөкүмәтниң өчмәнликигә учриған иди. Улар намратлиқ басқан йезиларда, давалиниш капалити йоқ бәлки сахта - зәһәрлик йемәкләрниң тәһдити астида чоң болди. Тәбиий апәт йүз бәргәндә йәнә өзлиригә баштин ‏ - ахир өчмәнлик билән муамилә қилип кәлгән коммунист әмәлдарлири сақ қелип, улар кәлгүсигә болған арзу - арманлири билән биллә көмүлүп өлди.

Гу юән әпәнди бу обзориниң ахирида, хәлқ арисида тарқилип келиватқан 'қарамай балилири болмаңлар, от кәтсә рәһбәрләр қутқузилиду, силәр отта көйисиләр. Хенән балилири болмаңлар, әйдиз вируси қениңларни булғайду. Сичуән балилири болмаңлар, 'ақ' чекидиған анаңлар йәттә кечә кәлмәйду. Сәнши балилири болмаңлар, ата - анаңлар силәрни көмүргә сатиду. Җуңго балилири болмаңлар, апәттә өлисиләр яки ач қалғанлар йәп кетиду' дегән қошақларни тәкрарлап өтти.

Бүгүн йеңи әср журнилида йәнә 'тәбиий апәт адәмгә пәқәт бирла қетим келиду, әмма коммунист апити һәммә вақит келип туриду' сәрләвһилик бир обзор бесилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.