Sidiqhaji rozi ependi yaponiyide doklat bermekchi

Süret, obzorchi, siyasiyon sidiqhaji rozi ependining 6 - ayning 16 - künidin 28 - künigiche yaponiyining bir qanche uniwérsitétida doklat béridighanliqi toghrisidiki teshwiqat élanidiki körünüshliridin.

Obzorchi, siyasiyon sidiqhaji rozi ependi 6 - ayning 16 - künidin 28 - künigiche yaponiyining bir qanche uniwérsitétida doklat béridiken. U, yaponiyide "5 - iyul ürümchi weqesini untumang", "sétiwétilgen sherqiy türkistan" dégen ikki témida doklat béridiken.

Bu pa'aliyetni uyushturghuchi komitétning ezaliridin biri bolghan yaponiye kagoshima xelq'ara uniwérsitéti oqutquchisi doktur haji qutluq qadirining éytishiche, bu pa'aliyet yaponiyining iqtisadiy yardimi bilen ötküzilidiken. Pa'aliyette öktichi xitay mutexessisler, teywenlik mutexessislermu doklat béridiken.

Bu pa'aliyet her yili ötküzülüp kéliniwatqan bolup, bu yilqisi Uyghur mesilisige atalghan. 2008 - Yilidiki pa'aliyet, "2008 béyjing olimpiki we tibet mesilisi" témisida ötküzülgen. Bu pa'aliyet 6 - ayning 16 - küni, yaponiyining paytexti tokyoda ötküzülidighan doklat bérish yighini bilen bashlinip, 28 - chéslaghiche dawamlishidiken. 6 - Ayning 18 - küni tibetlerning diniy dahiysi dalay lamamu resmiy ziyaret üchün yaponiyige baridiken.

Obzorchi sidiqhaji rozi ependi 1944 - yili 6 - ayning 15 - küni atushta dunyagha kelgen. Medeniyet zor inqilabi mezgilide 1969 - yilidin 1977 - yilighiche türmide yatqan. 1978 - Yili rabiye xanim bilen toy qilghan. 1982 - Yili ürümchidiki ma'arip institutida oqutquchiliq qilishqa bashlighan. 1996 - Yili amérikigha chiqip ketken. 1999 - Yili ayali rabiye qadir xanim xitay türmisige tashlan'ghan. Obzorchi sidiqhaji rozi hazir amérikining wirjiniye shitatida yashimaqta.

Yaponiyide ötküzülidighan mezkur pa'aliyet heqqide yaponiye kagoshima xelq'ara uniwérsitéti oqutquchisi haji qutluq qadiri ependi bilen söhbet élip barduq.

Yuqiridiki awaz ulinishidin, bu heqtiki söhbitimizning tepsilatini anglaysiler.