Сиднейда 5 - июл үрүмчи қирғинчилиқиға қарши йәнә намайиш өткүзүлди

Сүрәт, 8 - айниң 2 - куни, йәкшәнбә, сидней шәһиридики уйғурларниң шәһәр мәркизидики белморә бағчисиға йиғилип, хитайларниң уйғурлар устидин қәтлиам елип барған 5 - ийул қатиллиқ қилмишиға қарши елип барған намайишидин бир көрүнүш.

Бу намайишқа уйғур көчмәнләр, уйғурларниң қириндиши болған түркләр, бу қирғинчилиққа ғәзәпләнгән һәрхил милләтләрдин тәркип тапқан уйғурларниң достлири болуп 1000 гә йеқин киши қатнашти. Белморә бағчисиға топланған бу намайишчилар қошуни "уйғурларға әркинлик!", "шәрқи туркистанға әркинлик!", "хитай террорчилири чиқип кәт" қатарлиқ шоарлирини сидней шәһириниң асаслиқ кочилиридин бири болған елизабета кочисида җараңлиқ яңритип, йүрүшини башливәтти. Сәпниң алди, қанға боялған майкиларни кийгән 4 яшни ялап елип маңған хитай сақчилириниң формисиға нәқил қилип кийингән 4 яш билән башлинип, ай юлтузлуқ көк байрақлар, һәр хил шоарлар йезилған шоар тахтилири, шоарлар бйсилған көк рәңлик шарлар... Көктә җәвлан қилди вә миңлиған кишиләрниң диққитини тартти. Намайишчилар йүрүшини сидней шәһириниң мәркизи мәйданлиридин бири болған һийде бағчисида тохтитип хитайниң қилмишлирини әйибләшләр башланди.

Бу намайишни тәшкиллигән австралийә уйғур җәмийитиниң баш катиби мәһәммәтимин әла әпәнди сөзгә чиқип хитайларниң 5 - июл қирғинчилиқини тәпсилий чушәндуруп, инсан қилипидин чиққан вәһшиликини паш қилди, хитайниң таҗавузи, зулуми, ассимилятсийә сясити вә уйғурларни қанлиқ бастуруп киливатқан қилмишлирини әйиблиди һәмдә уйғурларниң хитай таҗавузиға һәр вақит қарши икәнликини, уйғур вәтининиң нами "шинҗаң"әмәс, шәрқи түркистан икәнликини билдүрди.

Сөзгә йәнә түрк җамаәтчиликиниң абройлуқ имами исмаил баққал тәклип қилинди у сөзидә : уйғурлар ялғуз әмәс, уйғурлар аҗиз әмәс, буни 1 милярд 400 милйон аһалигә, кучлук армийигә игә хитай билән қаршилишип уйғур дегән намини, пак иманини сақлап келиши, болупму 5 - ийолдики қәһриманлиқи испатлап турупту, биз уйғурдин ибарәт миллий вә диний қириндашлиримиздин пәхирлинимиз, дуня пәхирлиниду, һәқиқәт силәрдә, ғәлибә ахири силәрниң. У намайиш қатнашқучилириға имамлиқ қилип шеһидләрниң намизини чүшүрди вә дуалар қилди һәмдә кәчүрүм тәшкилати, тибәт җәмийити қатарлиқ көплигән тәшкилат вә органларниң вәкиллири сөзгә чиқти.

Намайишчилар арисида "номуссиз хитай қатиллири!", "хитайниң импириял түзүми йоқалсун!" дәп йезилған тахтиларни көтүрүвалған яшанған киши вә яш қизға козум чүшти - дә, уларниң енгилиз ата - бала икәнликини, бу кишиниң исми колин андерсон икәнликини билип уларниң намайишқа қатнишиш сәвәбини соридим. У киши: биз уйғурлар билән бир сәптә туруш учун бу намайишқа кәлдуқ. Бир йил аввал бәхтигә яриша, рабийә кадирни көргән идим, мана һазир китабини оқуватимән. Хитайлар уйғурлар устидин кеңәймичилик сияситини илип берип, аққунлар билән уйғурларни йоқ қилмақчи болуватиду вә қирғинчилиқлар илип бериватиду, бу қилмишларға йол қоюшқа болмайду, деди. Униң қизи сриан : хитайниң қиливатқанлири наһәқчилик, улар вәһшийлик қиливатиду, бир - икки адәм болсақму уйғурлар билән бир сәптә туруп күч қошмақчимиз, деди.

Намайишчиларға һәвәс билән қарап турған бир енглиз ханим : мән уйғурларни үрүмчидики қирғинчилиқтин кейин билдим, хитайлар һәддидин ашти, уйғурлар һәқиқаний дәвасини тохтатмаслиқи керәк, деди.

Намайиш ахирида намайишчилар билән тамашибинлар қоллирини тутушуп мәйданға кеңәйгән адәм чәмбирики ясап, шеһидләр учун бир минут сүкүттә турди һәмдә "уйғурларға әркинлик!", "хитай қирғинчилиқни тохтат!", "уйғуристанға әркинлик!" дегән шоарлар бйсилған көк рәңлик шарлар әркинликниң, тинчлиқниң символи қилип қоюп берилди.

Сйднейниң сүзүк асминида көккә көтүрүлүп кетиватқан шарлар ғайип болғичә миңлиған үмидлик көзләр тикилип турушти.

Юқиридики аваз улинишидин, бу һәқтики мәлуматимизниң тәпсилатини аңлайсиләр.