Xan jemeti saqchi orgini kanadadiki xitay shirketlirining aldamchiliq weqesini tekshürmekte

Kanadadiki xitay shirketlirining iqtisadiy setchilikliri barghanséri köpeymekte. Kanada xan jemeti saqchi idarisi aksiye bazirigha kirgen “Xitay orman shirkiti” ning kanadadiki iqtisadiy aldamchiliqini tekshürmekte.
Ixtiyariy muxbirimiz kamil tursun
2011.12.29
sino-forest-company-kanada-305.jpg “Sino-forest korp” yéni “Xitay orman shirkiti” ning tor bet körünüshi. 2011-Yili dékabir.
www.sinoforest.com

Kanada xan jemeti saqchi idarisi aksiye bazirigha kirgen, xitayning eng chong shirketliridin biri bolghan “Xitay orman shirkiti” kanadadiki iqtisadiy aldamchiliq qilmishlirini tekshürmekte. Xitayning kiyim-kéchek we ayaq sodisi bilen shughullinidighan yene bir shirkitining kanada aksiye bazarliridiki pa'aliyiti toxtitildi.Yéqinqi yillardin béri, xitay shirketliri kanada bazarlirigha kirgendin kéyin iqtisadiy setchiliklermu barghanséri köplep otturigha chiqmaqta.

Kanada xan jemeti saqchi idarisi xitayning kanadada pa'aliyet qiliwatqan “Sino-forest korp” yéni “Xitay orman shirkiti” ge qarita jinayi ishlar boyiche resmiy tekshürüshni bashlidi. Bu tekshürüsh bu shirketning mal-mülük we meblegh-kirimlirini köptürüp körsitish arqiliq, kanadaliq meblegh salghuchilarning nechche milyard dollarliq sermayisini aldap qolgha keltürgen-keltürmigenlikini éniqlashni öz ichige alidu. Eger yuqiriqi eyiblesh heqiqeten ispatlansa,bu kanada tarixidiki eng chong aksiye baziri aldamchiliq délosi bolup qalidu.

Bu yilning otturilirida, “Xitay orman shirkiti” ning xitaydiki meblighini köptürüp melum qilghanliqi ashkarilan'ghan idi. Ontari'o shtatining aksiye bazirini nazaret qilish orgini awghust éyida mezkur shirketning iqtisadiy aldamchiliqigha a'it delil-pakitlarni bayqighanliqi we bu shirketning yuqiri derijilik emeldarlirining saxtipezlik qilmishlirida bolun'ghanliqini bildürüp, uning toronto aksiye baziridiki sodisini toxtatqanliqini élan qilghanidi.

“Xitay orman shirkiti” toronto aksiye bazirigha kirgen, xitayning eng chong shirketliridin biri bolup, uning asasliq pa'aliyiti xitay quruqluqida.Bu shirket torontodiki aksiye bazirigha kirgendin kéyin, xitayning iqtisadiy jehettin dunyada bash kötürüwatqanliqigha we uning yaghach matériyallargha bolghan éhtiyajining ashidighanliqigha ümid bilen qaraydighan kanadaliq meblegh salghuchilarni özige jelp qilghan shundaqla shirketning emeliy bazar qimmiti qisqa waqit ichide téz yüksilip, 6 milyard dollargha yetkenidi.

“Yershari pochtisi” gézitining musteqil tekshürüshige qarighanda,ular “Xitay orman shirkiti”ning bezi élim-sétim ishlirining ochuq-ashkara emeslikini we bu shirketning xitaydiki meblegh we mal mülüklirining emeliy qimmitining ular melum qilghan san bilen köp perq qilidighanliqini bayqighan.

Mezkur gézitning ashkarilishiche, “Xitay orman shirkiti” ning aldamchiliq délosini tekshürüwatqan xan jemeti saqchi idarisining pul-mu'amile organlirini nazaret qilish etriti nöwette kanada bilen xitaydin ibaret ikki dölet otturisidiki musape, til we qanun-edliye qatarliq mesililerde türlük qiyinchiliqlargha yoluqqan.

Kanada metbu'atlirining eskertishiche, toronto aksiye bazirigha kirgen xitayning yene bir chong shirkitimu maliye mesilisidiki qalaymiqanchiliqlar sewebidin tekshürülmekte. Ontari'o shtatining aksiye bazirini nazaret qilish orgini kiyim-kéchek we ayaq sodisi bilen shughullinidighan “Zungu'i” isimlik bu shirketning pay chéki baziridiki barliq pa'aliyetlirini toxtatqan we shirketning yuqiri derijilik ikki neper emeldari üstidin sot orunlirigha erz sun'ghan.

Kanada axbarat agéntliqining aldinqi künidiki xewirige qarighanda,nöwette “Xitay orman shirkiti” ning tekshürülüwatqanliq xewiri otturigha chiqqandin kéyin, uning bazar qimmiti eslidiki 6 milyard dollardin 2 milyard 3 yüz milyon'gha chüshüp qalghan, yeni bu bir nechche ayda, bu shirketning texminen 3.7 Milyard dollarliq qimmiti érip tügigen.

Yéqinqi yillardin béri, xitay shirketliri kanada bazarlirigha kirgendin kéyin iqtisadiy setchiliklermu barghanséri köpeygen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.