Memliketlik siyasiy kéngesh qanun tüzmise, qanun ijra qilmisa, qanuninimu tonumamdu?

Xitay emeldarliri qanun tikleydighan organmu emes, qanun ijra qilidighan organmu emes dep jakarlighan memliketlik siyasiy kéngesh hazir béyjingda chong yighin échiwatidu.
Muxbirimiz weli
2011.03.03
yasimen-police-van-beijing-305.jpg Xitay memliketlik siyasiy kéngeshi béyjingda chong yighin échiwatqan mezgilde saqchi mashinisi tyen'enmén meydanida charlash élip bardi. 2011-Yili 3-mart.
AFP

Bügün xitayning shinxu'a agéntliqi memliketlik siyasiy kéngesh yighini heqqide élan qilghan xewiride, bu qétim siyasiy kéngesh chong yighinida xelq turmushi mesilisi muzakire qilinidu dep jakarlidi.

B b s ning bayan qilishiche, tünügün bu chong yighinning échilghanliqini jakarlaydighan axbarat yighinida, xitayda chong ziyaliy dep teswirlinidighan chong emeldar jaw chijéng muxbirlargha “Siyasiy kéngesh qanun tüzidighan organmu emes, qanun ijra qilidighan organmu emes” dégende, muxbirlar, bolupmu chet'el muxbirliri ichide, undaq bolsa u bu yerde néme ish qilidu, dep ghulghula kötürülgen idi. Bu chong yighin'gha kelgen chong wekiller, közi xelq ichidiki ré'al mesililerni körmeydighan kishilermu? namratlar bilen baylarning perqi shu qeder chonglap ketkenni, öy bahasi ghelite örlep, pul paxalliship ketkennimu sezmemdu? dégen so'allar chiqqan.

Merkizi agéntliqning bayan qilishiche, ottura sherqte yasimen inqilabi qozghalghandin kéyinla, xitay herbiy qisimlarning we ishchilarning ma'ash ölchimini östürgen idi. Herbiylerning ma'ashini az dégende qiriq pirsent östürdi. Ofitsérlargha qarighanda, eskerlerning ma'ashini eng köp östürdi. Yer igilep chégra qoghdaydighan bingtu'en emeldar,ishchi-xizmetchilirining eng töwen ma'ashini 22 ming yüen dep békitti.

Xitayning shinxu'a agéntliqining bayan qilishiche, shénjén shehiride adem bayliqi we uninggha munasip haldiki ijtima'iy sughurta mesilisi hel qilinip boldi. Ishchilarning eng töwen ayliq ish heqqi 1 ming 320 yüen qilip békitildi.

Amérika awazining bayan qilishiche, xitay qelemkeshliri jem'iyiti dégen xelq'araliq teshkilat bügün xitayni, ikki chong yighinni qoghdash dégen nam bilen muxbirlarning uchur erkinlikige kashila qildi dep qattiq eyiblidi.

Bügün yaponiyide chiqidighan “Asaxi shinbun” gézitide, xitayning ikki chong yighini heqqide élan qilin'ghan obzorlar we xitayda ikki chong yighin bashlan'ghan haman, xitayning urushchi ayropilanliri yaponiyining arallirigha yéqinlashqanliqi, yaponiyining urushchi ayropilanliri uning aldigha chiqqan haman, derhal qaytip ketkenliki heqqidiki resimlik xewer chong sehipe igilidi.

Uningda, xitayning memliketlik siyasiy kéngishi, xuddi béyjingdiki axbarat yighinida jakarlighandek, qanun tüzidighan organmu emes, qanun ijra qilidighan organmu emes bolsa, sorap baqayli, u, xitayning asasiy qanuninimu bilmeydighan we étirap qilmaydighan organmu dep so'al otturigha qoyuldi.

Uningda bayan qilinishiche yene, yézidin béyjinggha kelgen 30 yashlar chamisidiki bir ishlemchi bu gézitning muxbirigha, yekshenbe küni saqchilar kochida kétiwatqan kishilerning qolidiki yasimen gülini tartiwélip, yerge tashlap dessigenlikini, xelqni haqaretligenlikini, tutushqa urun'ghanliqini körüp, hazir yasimen inqilabi boluwatqanliqini bildim. Eger uchurlardin xewerdar bolalighan bolsam, menmu yasimen inqilabigha qatnishattim, hazir xelqte, asasiy qanunda belgilen'gen toplinish, namayish qilish hoquqi tügül, hetta kochida méngish hoquqimu qalmaywatidu, hazir yighin échiwatqan memliketlik siyasiy kéngesh ezaliri xelqte hoquq barliqini étirap qilmaydighan, hökümetning qanunsizliqini hergiz közi körmeydighan ademler, dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.