Memet toxti ependi shiwétsiye köchmenler ministirliqining mes'ulliri bilen körüshti

Dunya Uyghur qurultiyining yawropa birlikidiki ish béjirgüchisi memet toxti ependi, ötken aylardiki ikki qétimliq sepiride shiwétsiye köchmen ishliri ministiri we b d t insan heqliri komisyonini ziyaret qilghan idi. Ü bügün, yeni 3-nöwetlik sepiride , shiwétsiye köchmenler ishliri ministirliqining edliye ishliri diréktori bilen körüshti. Memet toxti ependi diréktor bilen körüshkende, Uyghurlarning uzun mezgil tashqi dunyadin xewersiz qaldurulghanliqini, bu seweblik, siyasiy panahliqqa alaqidar qanun-tertiplerni toluq bilmeydighanliqini we buning aqiwitide ularning öz ehwalini siyasiy panahliq iltimasida toghra we toluq ipadilep bérelmigenlikini misal we pakitlar bilen otturigha qoyghan.

Memet toxti ependi yene, xitayning nöwettiki weziyitide Uyghurlarning wetendin ayrilghanda öz ehwaligha munasiwetlik pakitlarni, jümlidin resim, höjjet, uqturush, hetta kinishka qatarliq nersilerni chégradin élip chiqishining mumkinsizlikini chüshendürgen. Shunga u mes'ul xadimlardin Uyghur panahlan'ghuchilarning iltimasini közetken we uning üstidin höküm chiqarghanda, ularning bu tür emeliy ehwalini nezerdin saqit qilmasliqini telep qilghan. Mes'ul xadimlar, bu chüshendürüshlerdin özlirining belgilik derijide qana'et hasil qilghanliqini bildürüshken.

Memet toxti ependi ziyaritimizning axirida, özining 3 qétimliq shiwétsiye sepiride shiwétsiye ma'arip we hemkarliq jem'iyitining alahide roli barliqini bildürdi. Uning bildürüshiche, mezkur jem'iyet shiwétsiye parlaméntidiki bir qisim parlamént ezalirining himayisini qolgha keltürüsh we heriketlendürüsh arqiliq, hökümettiki alaqidar mes'ul xadimlarning Uyghur panahlan'ghuchilar mesilisige qarita diqqet-étibarini ashurghan. Memet toxti ependining bildürüshiche, nöwette shiwétsiyede siyasiy panahliqi ret qilin'ghan 50 nechche kishi bolup, bularning iltimasi aldimizdiki 1-2 ay ichide qaytidin qarap chiqilishi yaki testiqlinishi mumkin.