Хәлқ тәрәпкә өткән сүрийә әскәрлири ғәлибә қилмақта

Сүрийә һакимийити өз хәлқини қиришта әрәб дөләтлири бойичә рекорт яратқан болди. Өткән тоққуз айдин бири сүрийидә һөкүмәт әскәрлири вә сақчилири тәрипидин өлтүрүлгәнләрниң сани һәр қайси әрәб дөләтлиридики намайишларда өлгәнләрдин әлвәттә көп икән.

Сүрийидә хәлқ намайиши көтүрүлгәндин бири хәлқ тәрәпкә өткән һөкүмәт әскәрлириниң саниму аз әмәс

Лондонда чиқидиған “оттура шәрқ” гезитиниң 2011-йили 12-декабир санида “хәлқ тәрәпкә өткән әскәрләрниң сүрийиниң җәнубидики ғәлибиси”дегән темида бир мақалә елан қилинған болуп, мақалидә мундақ дәп йезилған:
“сүрийә армийисидин айрилип хәлқ тәрәпкә өткән әскәрләр билән һөкүмәт тәрәпдаридики әскәрләр оттурисидики әң қаттиқ тоқунуш 11-декабир күни сүрийиниң җәнубида йүз бәргән. Әң ахирқи нәписини тиниватқан әсад һакимийити һәрбий сәптин айрилип, җәнубий сүрийә районида мәркәзләшкән вә өзлирини ‛әркин армийә‚ дәп атиған хәлқчил қошунға зәрбә бериш үчүн еғир типтики қораллар вә танкилар билән қоралланған һәрбий қошунини әвәткән болсиму, улар хәлқ тәрәпкә өткән қошун тәрипидин мәғлубийәткә учриған. Сүрийиниң җәнубидики“әркин армийә” қошуни һөкүмәт тәрәпдари болған қошунни арқиға чекиндүрүп, уларниң үч танкисини партлитип ташлиған. Бу сүрийидики 9 айдин берики әң чоң тоқунуш болуп, сүрийидә қозғалған хәлқниң ғәлибигә қәдәм қоюватқанлиқини вә әсад һакимийитиниң ғулап чүшүш алдида туруватқанлиқидин дерәк бериду.”

Чоң дөләтләр сүрийини агаһландурмақта

Мақалидә йәнә мундақ дәп йезилған: “америка, франсийә вә әнглийә қатарлиқ дөләтләр сүрийә һакимийитини һәмс шәһиригә һуҗум қилиштин сақлинишқа агаһландурмақта. Әмма сүрийә һакимийити өзини ақлаш үчүн сүрийиниң һәмс шәһиридә бир түркүм террорчиларниң барлиқини вә өзлириниң уларни уҗуқтурмақчи икәнликини дәва қилип келиватиду. Сүрийидики әсад һакимийити өз дәвасини испатлаш үчүн сүрийә ахбарат агентлиқи арқилиқ, сүрийиниң һәмс шәһиридики террорчилар һәмс шәһәрлик газ ширкитиниң башлиқи маһир ғедирни өлтүрди, дегән хәвәрни тарқатқан.”