Xelq terepke ötken süriye eskerliri ghelibe qilmaqta

Süriye hakimiyiti öz xelqini qirishta ereb döletliri boyiche rékort yaratqan boldi. Ötken toqquz aydin biri süriyide hökümet eskerliri we saqchiliri teripidin öltürülgenlerning sani her qaysi ereb döletliridiki namayishlarda ölgenlerdin elwette köp iken.

Süriyide xelq namayishi kötürülgendin biri xelq terepke ötken hökümet eskerlirining sanimu az emes

Londonda chiqidighan “Ottura sherq” gézitining 2011-yili 12-dékabir sanida “Xelq terepke ötken eskerlerning süriyining jenubidiki ghelibisi”dégen témida bir maqale élan qilin'ghan bolup, maqalide mundaq dep yézilghan:
“Süriye armiyisidin ayrilip xelq terepke ötken eskerler bilen hökümet terepdaridiki eskerler otturisidiki eng qattiq toqunush 11-dékabir küni süriyining jenubida yüz bergen. Eng axirqi nepisini tiniwatqan esad hakimiyiti herbiy septin ayrilip, jenubiy süriye rayonida merkezleshken we özlirini ‛erkin armiye‚ dep atighan xelqchil qoshun'gha zerbe bérish üchün éghir tiptiki qorallar we tankilar bilen qorallan'ghan herbiy qoshunini ewetken bolsimu, ular xelq terepke ötken qoshun teripidin meghlubiyetke uchrighan. Süriyining jenubidiki“Erkin armiye” qoshuni hökümet terepdari bolghan qoshunni arqigha chékindürüp, ularning üch tankisini partlitip tashlighan. Bu süriyidiki 9 aydin bériki eng chong toqunush bolup, süriyide qozghalghan xelqning ghelibige qedem qoyuwatqanliqini we esad hakimiyitining ghulap chüshüsh aldida turuwatqanliqidin dérek béridu.”

Chong döletler süriyini agahlandurmaqta

Maqalide yene mundaq dep yézilghan: “Amérika, fransiye we en'gliye qatarliq döletler süriye hakimiyitini hems shehirige hujum qilishtin saqlinishqa agahlandurmaqta. Emma süriye hakimiyiti özini aqlash üchün süriyining hems shehiride bir türküm térrorchilarning barliqini we özlirining ularni ujuqturmaqchi ikenlikini dewa qilip kéliwatidu. Süriyidiki esad hakimiyiti öz dewasini ispatlash üchün süriye axbarat agéntliqi arqiliq, süriyining hems shehiridiki térrorchilar hems sheherlik gaz shirkitining bashliqi mahir ghédirni öltürdi, dégen xewerni tarqatqan.”