Süriye hakimiyitining wehshiyliki we ulugh jüme namayishi

Süriye re'isi beshshar el esedning xelq'ara jinayi ishlar mehkimiside jazalinishini telep qilidighan awazlar dunyaning her jaylirida yangrashqa bashlidi.

Shu weziyette bügün 27-may jüme küni süriyining qamushli, hems, der'a qatarliq bir qanche shehiride on minglarche kishi chong kölemlik namayishini dawam qildurdi we bu jüme künini “Weten qoghdighuchilar küni” dep atashti.

Qatarning“El jezire” téléwiziye qanilining 27-may jüme künidiki xewiride, süriye saqchilirining namayishchi xelqni qandaq qiynap öltürgen wehshiylikliri eks etken resimlerni körsetken bolup, süriyide namayish partlighandin biri hazirghiche tutqun qilin'ghan on mingdin artuq süriyilikning nurghunliri shundaq wehshiy qiynashlargha uchrighanliqini, ularning ichidin qiynash jeryanida ölgenlerningmu az emeslikini, ularning jesetlirini chüshürgen resimler bilen körsetti.

Mundin bir qanche kün ilgiri süriyining liwan chégrasigha yéqin bir yéride tutulghan namayishchilar bilen bir qatarda qolgha élin'ghan 13 yashliq welid isimlik bir balining ikki biqinigha yéqindin oq étilghan, put-qolliri chéqiwétilgen, jinsiy orgini késip tashliwétilgen we yüzi bilen meydisi qima-chima qiliwétilgen qorqunchluq jesiti süriye hakimiyitining insan qélipidin chiqqan wehshiylikini dunyagha tonutti hetta “El jezire” téléwiziye qanilida körsitilgen bu échinishliq resimler shu programmini sun'ghuchini yighlitiwetti.

Emma süriye saqchilirining namayishchi xelqni oqqa tutup öltürgenliri buning sirtida bolup, her künlüki neq meydanda étip öltürülgenlerning omumi sani kazafiy yandashlirining top zembirekliri bilen öltürülgen liwiyiliklerning sanidin éship ketkenliki sözlenmekte.

“Weten qoghdighuchilar küni” namayishi

Süriyilik namayishchilardin serhebun muhemmed isimlik biri süriyining qamushli shehiridin qatarning “El jezire” téléwiziye qaniligha bergen bayanatida mundaq dédi:
-Bügün jüme namizidin kéyinla namayishqa atlinip chiqtuq we bu jümediki namayishimizni “Weten qoghdighuchilar küni” dep atiduq. Namayishchilarning arisigha suqunup kiriwalghan puqrache kiyin'gen saqchilar yenila her xil usulliri bilen adem tutushni dawam qilmaqta. Süriye armiyisining xelq terepte turushini köp qétim telep qilduq. Emma ulardin héchqandaq bir ijabiy sada chiqmidi. Biz bu jümeni “Weten qoghdighuchilar küni” dep atishimizda süriye armiyisini közde tutqanmiz. Chünki süriye armiyisi wetenni tashqi küchlerning hujumidin qoghdighuchilar bolghinidek, namayishchi xelqni beshshar el esedning qetli'amidin, wehshiy qiynashliridin qoghdishi lazimliqini eskertish we ularni oyghitishni meqset qilduq. Chünki süriye armiyisi xelqning baliliri. Ularning xelq terepte turmastin mustebit hakimiyetni qollap öz xelqini qirip tashlishi özlirini qirip tashlighanliqi hésablinidu. Shunga biz armiyimizning himayisini qolgha keltürüsh yolida bügünki namayishni orunlashturduq. Süriyining her qaysi jayliridiki namayishlarning hemmisi bu meqsetni közlimekte.