Һиларий клинтон түркийә ташқи ишлар министири билән сүрийә мәсилиси тоғрисида музакирә елип барди

8-Айниң 11-күни америка ташқи ишлар министири һиларий клинтон рәсмий зиярәт үчүн истанбулға кәлди.
Ихтиярий мухбиримиз арслан
2012-08-14
Share
exmet-dawutoghlu-hilariy-305.jpg Америка ташқи ишлар министири һиларий клинтон ханим түркийә ташқи ишлар министири әхмәт давутоғили әпәнди билән ахбарат йиғинида. 2012-Йили 11-авғуст, истанбул.
RFA/Arslan

Һиларий клинтон ханим һәмраһлиқидики һәйәт билән вашингтондин мәхсус айропилан билән истанбул ататүрк айродромиға чүшкәндә, истанбул валийси һүсәйин авни мутлу билән америкиниң истанбулда турушлуқ баш консулханисиниң мәсуллири қарши алди.

Һиларий клинтон, түркийә ташқи ишлар министири әхмәт давутоғлу билән истанбулдики конрад меһманханида учрашти вә сүрийидә йүз бериватқан ички уруш тоғрисида музакирә елип барди.Америка ташқи ишлар министири һиларий клинтон ханим түркийә ташқи ишлар министири әхмәт давутоғили әпәнди билән ахбарат йиғинида. 2012-Йили 11-авғуст, истанбул.

Бу учришишта икки тәрәп, «мухалипларниң қаттиқ қоллуқни тохтитиш, тиришчанлиқини қоллаш. Америкиниң мухалипларға қорал-ярақни өз ичигә алмиған инсанпәрвәрлик ярдәм әвәтиш. Сүрийидә демократик бир һакимийәтниң қурулушини қолға кәлтүрүш» тин ибарәт 3 муһим нуқтида музакирә елип барди.

Учришиш нәтиҗисидә, әсәд һакимийитиниң йимирилишини тезләштүрүш үчүн икки дөләт ортақ һәмкарлиқни күчәйтишни, көчмәнләргә ярдәм бериш, икки дөләт оттурисида ортақ бир хизмәт ишләш гурупписи қуруш қарар қилинди, һиларий килинтон ханим, түркийигә қарши һәрикәт қиливатқан п.К. К тәшкилатиға қарши түркийиниң йенида икәнликини ипадилиди.

Учришиштин кейин әхмәт давутоғлу билән һиларий клинтон ханим бирликтә мухбирларни күтүвелиш йиғини уюштурди вә мухбирларниң соаллириға җаваб бәрди.

Алди билән түркийә ташқи ишлар министири әхмәт давутоғлу икки тәрәпниң елип барған музакирилири тоғрисида сөз қилип мундақ деди: «сүрийидә йүз бериватқан трагедийилик паҗиәләргә хатимә бериш үчүн мәзмут қәдәмләрни бесиш асасий арзу-арманлиримиздур. Йеқиндин буянқи һәләптә йүз бериватқан вәқәләр һәммимизни қайғуландуриду, һәләптә өй-маканларға һава армийиси билән елип бериливатқан һуҗумлар һәм чоң бир инсани қәтлиамиға, һәм чоң бир тарих қәтлиамиға йол ечиватиду, хәлқара җамаәт әмди бу қәтлиамға очуқ вә ениқ бир шәкилдә ‹тохта!' дәйдиған қәдәмләрни бесиши керәк. Килинтон билән бу һәқтә бесишқа тегишлик қәдәмләр тоғрисида кәң түрдә музакирә елип бардуқ».

Әхмәт давутоғлу сөзидә әнә мундақ деди: «сүрийидә вәқәләргә әң қисқа муддәт ичидә хатимә берилиши вә бу җәрянда һәр қандақ бир күчниң пурсәтпәрәслик қилишиға йол қоймаслиқ тоғрисида охшаш қарашқа кәлдуқ. Сүрийә вәзийитиниң бошлуқидин пайдилинишни мәқсәт қилған дәсләптә п.Ки.Ки. Қатарлиқ террорлуқ тәшкилатларға қарши һәр түрлүк тәдбир елишимиз керәклики тоғрисида охшаш чүшәнчигә игә болдуқ.»

Америка ташқи ишлар министири һиларий клинтон, сүрийә мәсилисидә түркийә билән бирликтә немә қилиш керәклики тоғрисида музакирә елип барғанлиқини ипадиләп мундақ деди: «сүрийидә биринчи болуп мухалипларниң пүткүл тиришчанлиқлирини қоллап, қаттиқ қоллуқни тохтитиш керәк, әсәд болмиған демократик бир сүрийигә еришиш. Америкиниң сүрийә мухалиплириға қорал-ярақни өз ичигә алмиған иқтисадий ярдәм беришни давам қилиш, охшаш вақитта һәр түрлүк ярдәмлиримизни давам қиливатимиз.»

Һиларий килинтон ханим сүрийә хәлқигә ярдәм бериватқанлиқини, буниңдин кейинму ярдәм қилишни давамлаштуридиғанлиқини ипадиләп мундақ деди: «бирләшкән дөләтләр тәшкилати алий комитети васитиси арқилиқ 5 милйон доллар қошумчә ярдәм пули, хәлқара көчмән идарисиниң васитиси арқилиқ 500 миң доллар түркийигә көчүп йәрләшкән сүрийиликләргә ярдәм беришни нишан қилдуқ. Бу ярдәм билән биргә америкиниң, йемәк-ичмәк, сағлиқ, йотқан-көрпигә охшаш еһтияҗлар үчүн тәминлигән ярдәм пули 82 милйон долларға йәткән болди.»

Мухбирларни күтүвелиш йиғинида америка ташқи ишлар министири һиларий килинтон мухбирларниң соалиға җаваб берип, б д т, сүрийә ичидә 2 милйон инсанниң ярдәмгә еһтияҗи барлиқини, 140 миңдин артуқ кишиниң сүрийигә қошна дөләтләргә қачқанлиқини тәхмин қилғанлиқини ипадилиди вә булардин 55 миң кишиниң түркийигә йәрләшкәнликини вә техиму көп инсанниң түркийигә келидиғанлиқини тәхмин қилғанлиқини билдүрди.

Клинтон ханим әрдуған билән учрашти

Түркийә баш министири рәҗәп таййип әрдуған истанбул долмабағчә сарийидики ишханисида һиларий килинтон ханимни қобул қилди. Әрдуған билән һиларий клинтонниң учришиши бир йерим саәт давам қилди. Бу учришиш мухбирлардин мәхпий өткүзүлгән болуп, немә тоғрисида сөһбәтләшкәнлики билдүрүлмиди. Учришиштин кейин түркийә баш министирлиқидин, бу учришиш тоғрисида бир синалғу көрүнүши мухбирларға тарқитилди.Түркийә баш министири рәҗәп таййип әрдуған долмабағчә сарийидики ишханисида һиларий килинтон ханимни қобул қилди. 2012-Йили 11-авғуст, истанбул.

Америка ташқи ишлар министири һиларий клинтон ханим әрдуған билән учришип болғандин кейин, түркийә җумһурийити рәиси абдуллаһ гүл билән истанбул тарабийәдики һабер сарийида учрашти. Мухбирларниң кириши рухсәт қилинмиған бу учришиш 2 саәт давам қилди.

С н н түрк телевизийисиниң бу һәқтә тарқатқан хәвиригә қариғанда, абдуллаһ гүл, клинтон ханим билән учрашқанда сүрийидә еғир паҗиәләрниң йүз беришигә йол ечилмаслиқи вә йеңидин қурулидиған һакимийәттә пүткүл милләтләрниң вәкили болушиниң әһмийитини тилға алған вә сүрийиниң бөлүнмәслики, земин пүтүнлүкини қоғдашқа әһмийәт бериш керәкликини ипадилигән.

Америка ташқи ишлар министири һиларий клинтон ханим, абдуллаһ гүл билән учрашқандин кейин, мәхсус айропилан билән америкиға қайтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт