Ereb metbu'ati : esed néme üchün sadam we kazafiyning aqiwitidin ibret almaydu?

Süriye krizisi eng uzun dawam qilghan we ang köp bedel tölen'gen bir krizis bolup qaldi. Tehlilchilerge köre, süriyidiki urushlar süriye re'isi beshshar el esedning terepdarliri bilen xelq otturisidiki küch sinishish urushigha oxshap dawam qilmaqta iken.
Ixtiyariy muxbirimiz ömerjan
2012.12.12
Share on WhatsApp
Share on WhatsApp
suriye-namayish-yarilanghan-xelq-305.jpg Saqchilar namayishchilarni basturush jeryanida yarilan'ghan kishiler. 2012-Yili 9-féwral, süriye.
AFP

Ishning yaman bolghan teripi süriye re'isining qarshi tereptin intiqam élish üchün yadro qorallirini qollinish éhtimalining köplüki iken. Chünki beshshar el esedchiler hazir hoshini we eqil tengpungluqini yoqatqan bir qirghinchi küchke aylinip qalghan bolup, kündilik adem öltürüsh ularning aditige aylinip qalghan.

Se'udi erebistanida chiqidighan “El bilad” gézitining 2012-yili 10 dékabir künidiki sanida, “Esed néme üchün sadam we kazafiylarning aqiwitidin ibret almaydu?” dégen témida bir maqale élan qilin'ghan bolup, maqalide mundaq dep yézilghan:
“Süriye re'isi beshshar el esedni qollap kéliwatqan döletlerning mewqesi özgirish aldida turmaqta. Belki bu döletlerning mewqesi özgirip bolghan. Emma uni ochuq élan qilishta her xil muqeddimilerge bash urmaqta. Mesilen: rusiye bash ministiri médwédéfning sözidin rusiyining beshshar el esedni qollashtin zérikkenliki we axirighiche qollashni dawam qilalmaydighanliqi chiqip turidu. Emma iranning diniy rehbiri xami'ining meslihetchisi we tashqi siyaset ishliri mes'uli éli ekber wilayiti “Iran süriye re'isini qollashqa dawam qilalmaydu we dawam qilish niyitimu yoq”dep ochuq sözligen. Démek, esedni qollap kelgen ikki muhim dölet uningdin qolini tartish aldida turmaqta. Esedning tügeshkini chiqip turidu. Emma u ré'alliqqa ten bérishni xalimaydu.”

Sadam bilen kazafiymu shundaq chong sözligen

Se'udi erebistanida chiqidighan “El nedwe” gézitide yene “Zalimlarning hemmisi deslepte shundaq chong sözligen” dégen témida mundaq bir maqale élan qilin'ghan:
“Pir'ewnmu özini ilah dep dewa qilghan. Ema uning aqiwiti suda gherq bolup tügishish bolghan. Sadam hüsenmu chong sözleytti, hetta amérika bashchiliqidiki ittipaqdash qoshunning baghdatqa kirmey turup tügishidighanliqini sözleytti. Kazafiymu textining hergiz silkinmeydighanliqini sözleytti. Emma ular dunya zalimlirigha eng untulmas ibretlerni bergen halda, xorlinip öldi. Beshshar el esed 2012-yili 7-ayda téléwiziyige bergen bayanatida, süriyining ne iraqqa, ne liwiyige, ne misirgha oxshimaydighanliqini, qarshi küchlerning choqum meghlup bolidighanliqini ishench bilen sözligen idi. Emma emdilikte demeshiq bilen heleb ikki sheherdin bashqa süriye sheherliri asasen xelq armiyisining qoligha ötüp bolghan, beshsharni qollighanlarmu yüz örüsh aldida turuwatqan bu weziyette beshshar yenila ibret almidi. Chünki zalimlar jazasini tartmighiche ibret almaydu. Shundaq qilip ular kéyinki zalimlargha ibret bolup nagahan kétip qalidu. Beshshar üchün peqet sanaqliq künlerla qaldi. Buninggha qarighanda, beshshar özining ismini sadam we kazafilarning qatarigha pütüwetkendek qilidu. Chünki u mubarek yaki éli abdulla salihlar qataridin orun élishni xalimighan oxshaydu.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.