Süriyide “Salih éli jümesi” namayishi

Süriyide xelq namayishi dawam qilghinigha bir qanche ay bolup qaldi. Süriye xelqi deslepte süriyide omumiy islahat telep qilip namayish qilghan bolsimu, süriye hakimiyiti teripidin héchqandaq bir ijabiy jawab bolmighandin kéyin, bu namayish omumyüzlük süriye hakimiyitini texttin chüshürüshni telep qilidighan jiddiy namayishqa aylan'ghan idi.

Tehlilchilerge köre, süriye hakimiyiti arqisigha qaytalmaydighan tar kochigha kirip qalghan. Süriye re'isi beshshar esed süriyidiki hakimmutleq esed a'ilisining bésimi astida, qolidin héch ish kelmeydighan peqetla bir remzi bolup qalghan. Asasliq hakimiyet süriye armiyisining bash qomandani mahir esedning qolida bolup, namayishchilarni basturush, öltürüsh we tutqun qilish peqet mahir esedning buyruqi bilen élip bérilmaqta iken.

Süriye hakimiyiti hazirgha qeder süriyining her qaysi sheher we wilayetliride omumlashqan xelq namayishlirini we namayishchilarning teleplirini nezerge élip ketmigen, namayishchilarning teleplirige qulaq sélip, ular bilen söhbet élip bérishnimu ret qilip kelgen. Chünki ular qoral küchige hemmidin bek ishen'genliktin, her qandaq bir müshkülini qoral bilenla hel qilip kételishige ishen'gen.

Shu sewebtin ular namayishchilarni basturupla kelgen. Emma süriye hakimiyiti emdilikte xelqni qoral küchi bilen basturup bolalmaydighanliqini chüshen'gen bolsimu, qolidiki pursetlerni ötküzüwetkenliki seweblik ishlarni eslige qayturush mumkin emeslikini bilip yetken.

Shunga süriye hakimiyiti néme qilishini bilmestin ganggirap qalghan bir hakimiyet bolup meydan'gha chiqmaqta iken. Yene bir tereptin süriye armiyisi terkibidin köpligen herbiy qomandanlar özlirining namayishchilar sépige ötkenlikini élan qilip turmaqta iken.

Süriyining her qaysi sheherliride “Salih éli jümesi” namayishi

Qatarning “El jezire”téléwiziye qanilining xewirige köre, bügün 17-iyun jüme küni süriyining demeshiq, hamat, der'a, qamishli, bukamal we shimaliy rayonlirida “Salih éli jümesi” namayishi kötürülgen. Salih éli süriyidiki esed a'ilisi hakimiyitige qarshi küresh qilghan ülgilik shexs bolup, namayishchilar shu kishining namini we inqilabiy pa'aliyetlirini tirildürüsh niyiti bilen bu jümeni shundaq dep atighan iken.

Namayishchilarning iradisi kücheymekte

Süriyilik namayishchilarning wekilliridin biri bolghan hüseyn ewdat dégen kishi “El jezire”téléwiziye qaniligha 17-iyun küni bergen bayanatida mundaq dédi: “Bügün ötken her qaysi jüme künliridin chong kölemlik namayish süriyining her qaysi wilayetliri, sheherliri we nahiyiliride dawam qilmaqta. Yene ilgirikidekla namayishchilarni öltürüsh, tutqun qilish, öylerni axturush, ayallarni, balilarni we yashan'ghanlarni qorqutush jinayetliri süriye saqchiliri we armiyisi teripidin sadir bolmaqta. Hetta türkiye chégrasidin öylirige qaytip kelgen a'ililermu her türlük azab-oqubetlerge, qiz-ayallar basqunchiliqlargha uchrimaqta. Bu jinayetlerning hemmisini süriye armiyisi bilen saqchilar qiliwatmaqta. Bizning arqigha chékinishimiz yoq, süriye hakimiyitiningmu chékinishi yoq. Chünki ishlar bu derijige yetkendin kéyin xelq hergiz jim yatmaydu, süriye hakimiyitimu xelqni chirayliq wediliri bilen qanduralmaydu hem qilay désimu qilalmaydu. Shunga biz yolimizdin qaytmaymiz, axirqi ghelibini qolimizgha keltürmestin boldi qilmaymiz.”