Süriyidiki “Hakimiyetke qarshi birlishish” namayishi

Londonda chiqidighan “Ottura sherq”gézitining 2011-yili 23-séntebir jüme künidiki sanida élan qilin'ghan xewerge asaslan'ghanda, bügün jüme namizidin kéyin süriyining köpligen sheherliride omumyüzlük chong namayish kötürülgen bolup, süriyining her qaysi jayliridiki namayishchilar öz-ara birlikke kélish arqiliq bügünki namayishni “Hakimiyetke qarshi birlishish” dep atashqan. Namayishchilargha qarita süriye saqchilirining oq chiqirishi netijiside onlarche kishi hayatidin ayrilghan we nurghunliri yarilan'ghan.

Süriye adalet partiyisining bash katipi enes taha 2011-yili 23-séntebir jüme küni qatarning“El jezire” téléwiziye qaniligha qahire shehiridin bergen bayanatida mundaq dédi: “Süriye armiyisi tunis we misir armiyisige oxshash xelqning kütken yéridin chiqmidi. Shu sewebtin süriye namayishining méwe bérishi uzun'gha sozulup ketti. Biz perez qilghanning eksiche, süriye armiyisi bilen saqchiliri xelq terepke ötmidi, ular hazirmu esed hakimiyitini mudapi'e qilish bedilige xelqning qénini aqquzup keldi. Biraq, bu kélishmeslik namayishchilarning rohini chüshürmidi yaki ümidini yoqatmidi. Chünki axirqi ghelibe xelqqe mensup ikenlikini hemme yaxshi bilidu. Süriyidiki xelq inqilabi choqum ghelibe qilidu, ghelibe qilghandimu misir we tunislardikige oxshash emes, belki teltöküs ghelibe qilip, esed hakimiyiti we uning partiyisige xatime béridu. Buninggha imanimiz kamil. Bu ghelibining bésharetliridin biri shuki, hazir süriye hakimiyiti qoral küchi jehette küchlük bolghini bilen rohiy meniwiyet jehette meghlubiyetke uchrimaqta. Chünki uni qollaydighan chong döletler hazir emdi uninggha arqisini qilmaqta. Xelqning meniwiyiti barghanséri ashmaqta, öltürülüsh, tutqun qilinish dégenlerni namayishchi xelq kichik sanaydighan we uningdin qorqmaydighan bolup qalghan. Buning eksiche, süriye hakimiyiti xelqni tehdit qilish jehette ajizliship qalghan. Öltürüsh, tutqun qilish we urup dumballash bilen xelqni toxtatqili bolmaydighanliqini chüshinip yetken. Süriye armiyisimu xelqning baliliri ularning mustebit hakimiyetni qoghdap axirghiche turushi mumkin emes. Kazafiy hakimiyitining örülgenliki süriyidiki esed hakimiyitining pat yéqinda örülidighanliqidin bésharet béridu.”