Сүрийидики мәҗбури елип берилған рай синашниң нәтиҗиси елан қилинди

Сүрийидики әсәд һакимийити йәкшәнбә күни сүрийиниң һәр қайси шәһәрлиридә мәҗбури елип берилған, йеңи дәстурға хәлқниң райини сораш паалийитиниң нәтиҗисини елан қилди.
Ихтиярий мухбиримиз өмәрҗан
2012.02.29
Share on WhatsApp
Share on WhatsApp
suriye-namayish-305 Сүрийиниң дәра шәһиридики намайиштин бир көрүнүш2011-йил27-ноябир.
RFA

2012-Йили 27-феврал күни сүрийә дөләт телевизийисиниң рәсмий хәвиридә, сүрийидә мәҗбури елип берилған хәлқ райини синаш паалийитидә 89 пирсәнт хәлқниң сүрийидики әсәд һакимийитини қоллап аваз бәргәнлики елан қилинғандин кейин, явропа иттипақиниң ташқи ишлар министирлири баянат елан қилип, бу нәтиҗиниң сахта икәнликини билдүрүшти.

Һәтта америка ташқи ишлар министирлиқиниң “оттура шәрқ” гезитигә бәргән баянатида, сүрийидә мәҗбури елип берилған бу рай синашниң пәқәт вақитни зайә қилиштин башқиға яримайдиғанлиқини билдүрди.

Сәуди әрәбистанида чиқидиған “әл нәдвә” гезитиниң 2012-йили 28-феврал сәйшәнбә күнидики санида, “сүрийидә хәлқ райи сораш күнидә 65 адәм өлтүрүлди” дегән темида бир мақалә елан қилинған болуп, мақалидә мундақ дәп йезилған:
“26-феврал күни сүрийә һакимийити аталмиш йеңи қанунға хәлқ райини сораш һәрикити елип барған болуп, шу күниму адәм өлтүрүшни тохтатмиған вә һомс, һамат шәһәрлиридә өлтүрүлгәнләр ичидә 5 нарәсидә балиниң барлиқи дуняниң ғәзипини йәнә бир қетим өрләтти. Сүрийидики кишилик һоқуқ җәмийитиниң баянатиға асасланғанда, сүрийә һакимийити бир тәрәптин сахта райи синашни тәшвиқ қилип туруп, йәнә бир тәрәптин адәм өлтүрүшни тохтатмиған, һомс шәһирини 24 саәт тохтимай бомбардиман қилған. Хәлқ райини синаш һәрикити болған күни дәмәшқ шәһирини мәркәз қилған һалда пүтүн сүрийә тәвәсидә болған намайиш наһайити күчлүк болған. Бундақ бир әһвалда һәммә хәлқ әсәд һакимийитигә қарши намайишта турса, һөкүмәт уюштурған райи синашқа қайси хәлқ аваз бәргән? қандақму 89 пирсәнт адәм аваз бәрсун? бу әқилгә сиғамду?”

Сахта нәтиҗә һечкимни ишәндүрәлмәйду

Лондонда чиқидиған “оттура шәрқ” гезитиниң 2012-йили 28-феврал күнидики санида, “сүрийидә йеңи дәстурға хәлқ райи синашниң нәтиҗиси елан қилинди” дегән темида мундақ бир мақалә елан қилинған:
“сүрийә хәлқиниң мутләқ көп санлиқи әсәд һакимийитиниң бу аталмиш йеңи қанунға хәлқ райини сораш алдамчилиқиға қарши турған вә аваз бәрмәсликкә келишкән турса, бу 89 пирсәнт аваз нәдин келип қалди? униң үстигә әсәд һакимийити хәлқни бомбардиман қилишни бир минутму тохтатмиған турса, қайси хәлқ уларға аваз бәрди? бу растинила мәсхирилик бир иш болған. Сүрийә ички ишлар министири муһәммәд шоарниң ‛нөвәттики хәлқ райини сораш паалийитигә 57 пирсәнт сүрийилик иштирак қилди‚ дегән баянати техиму күлкилик болған. Әмма сүрийилик өктичиләр бу санниң ялғанлиқини елан қилишқа кечикип қалмиди. Улар аталмиш 89 пирсәнт аваз билән аталмиш 57 пирсәнт иштирак қилишниң тамамән ялған икәнликини дәлил-испатлири билән оттуриға қойди. Хусусән әсәд һакимийитигә қарши намайишлирини тохтатмиған вилайәтләрдики хәлқниң бу һакимийәтниң оюниға аваз бәрмигәнлики ениқ.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.