Хәлқни бастурған сүрийә һазир дуняниң бирликтә җазалишиға дуч кәлмәктә

Әрәб бирлики сүрийиниң әзалиқ салаһийитини вақтинчә әмәлдин қалдурушни қарар қилди. явропа бирлики сүрийини җазалаш үчүн йеңи тәдбир бәлгилиди.
Мухбиримиз вәли
2011.11.14
suriye-namayish-jeset-305.jpg Сүрийидики намайишчилар һөкүмәт тәрәптин өлтүрүлгән сәпдишиниң җәситини көтүрүп намайиш қилмақта. 2011-Йили 8-май.
AFP

Б б с ниң баян қилишичә, әрәб бирликигә әза 22 дөләт 11‏-айниң 12-күни қатарда йиғин ечип, сүрийә мәсилисини музакирә қилғанда, сүрийә, леван, йәмәндин башқа дөләтләрниң һәммиси бирдәк аваз бериш билән, сүрийиниң әрәб бирлики әзалиқ салаһийитини вақтинчә тохтитиш қарар қилинған иди. Бу қарарда йәнә әрәб бирлики сүрийигә җаза қоллиниш, әрәб бирликидики дөләтләр сүрийидин әлчиханилирини қайтуруп келиш мәсилисиму тәкитләнгән иди.

Түнүгүн сүрийә һөкүмити әрәб бирликиниң қарариға қарши баянат елан қилип, әрәб бирликиниң қарари хәтәрлик қарар, әрәб бирлики һазир ғәрб дөләтлири үчүн хизмәт қиливатиду, дәп әйиблигәндин кейинла, әрәб бирлики йиғининиң қарари үчүн актип аваз бәргән сәуди әрәбистани, қатар қатарлиқ дөләтләрниң дәмәшиқтә турушлуқ әлчиханилири һуҗумға учриди. Түркийиниң вә франсийиниң әлчиханилириму һуҗумға учриди.

Бүгүн иорданийә, түркийә, сәуди әрәбистани қатарлиқ дөләтләр сүрийини қаттиқ әйиблиди. Сүрийә президентиниң хәлқни қирғин қилишиға изчил қарши туруп келиватқан иорданийә падишаһи абдулла бүгүнки баянатида, сүрийә президенти асад дәрһал тәхттин чүшүши керәк, дәп җакарлиди. Түркийә ташқи ишлар министирлиқи бүгүнки баянатида, оттура шәрқтә хәлқ билән тинч өтмигән һәр қандақ әмәлдар әмди тәхттин чүшмәй мумкин әмәс, дәп көрсәтти. Сәуди әрәбистани, қатар қатарлиқ дөләтләрму сүрийидики әлчиханилирини қайтуруп келишкә башлиғанлиқини җакарлиди.

Франсийә агентлиқи бүгүн, сүрийә президенти бәшр әл асадниң сәккиз айдин буян намайиш қилған хәлқни бастуруп үч миң бәш йүз адәмни өлтүрүп болғанлиқи һәққидики тәпсилий мәлуматларни-‏ вәқәниң тәпсилати, вақти вә орнидин ибарәт пакитлирини ашкарилиди.

Бирләшмә агентлиқиниң брюсселдин баян қилишичә, бүгүн явропа бирликидики дөләтләрниң ташқи ишлар министирлири баш қошқан йиғинда, әрәб бирликидики 18 дөләтниң сүрийини җазалаш қарариға аваз қошидиғанлиқини, әмди сүрийини җазалаш үчүн йеңи тәдбир қоллинидиғанлиқини, бу җазалаш тәдбирлири мунасивәтлик кишиләргә виза чәклимиси қоюш, мунасивәтлик кишиләрниң мүлкини вә тиҗаритини тоңлитиш қатарлиқ мәзмунларни өз ичигә алдиғанлиқини, буниң конкрет маддилири икки күндин кейин рәсмий һөҗҗәт арқилиқ җакарлинидиғанлиқини билдүрди.

Явропа бирликиниң, әрәб бирликиниң вә қошна дөләтләрниң бүгүн сүрийә тоғрисида елан қилған баянатлири, русийә билән хитайни тәңлитә қалдурди. Хитай хәвәр агентлиқиниң москвадин баян қилишичә, өткән айда б д т да оттуриға сүрийини җазалаш һәққидә қарар елинғанда рәт қилиш һоқуқини ишләткән русийә бүгүн йәнила өз пикридин янмиған. Федерал һәрбий техника мулазимәт орни мәсули җеркалин, сүрийә вәзийитидә һәр қандақ өзгириш йүз бәрсиму, әмма русийә билән сүрийә оттурисида түзүлгән бир нәччә милярд америка доллирилиқ башқурулидиған бомба сетип бериш келишими тәсир гә учримайду, дәп җакарлиған.

Хитайниң “йәр шари вақит гезити”ниң тез хәвәрлиридә, явропа бирликидики 27 дөләт вәкиллири бүгүн сүрийини җазалаш мәсилисидә, явропа мәбләғ селиш банкисиниң мәблиғини сүрийигә ишләтмәслик тоғрисида пикир бирлики һасил қилди, бу, явропа бирлики қарар чиқиришниң биринчи қәдими дәп баян қилғанлиқидин қариғанда, хитай һазир явропа бирликиниң сүрийигә қаратқан йеңи җазалаш тәдбиридин әндишә қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.