Сүрийә вә йәмәндики “ахирқи ғәлибә” намайишлири давамлашмақта

Йәмәндә рәис абдулла салиһ һакимийитигә қарши намайиш давам қилип, барғансери кәскинләшмәктә.
Ихтиярий мухбиримиз өмәрҗан
2011-07-01
Share
yemen-namayish-tutqun-305.jpg Йәмән әскәрлири намайишчиларни тутқун қилмақта. 2011-Йили 20-апрел.
AFP

Йәмәнликләр 2011-йили1-июл җүмә күнидики намайишини ели абдулла салиһни тәхттин чүшүрүп, ахирқи ғәлибини қолға кәлтүрүш чақириқи билән “ахирқи ғәлибә намайиши” дәп атиған. Бүгүн йәмәнниң һәр қайси шәһәр вә йезилирида омумйүзлүк чоң намайиш давам қилди.

Тәһлилчиләргә көрә, йәмән рәиси ели абдулла салиһниң йәмәндики ишлар билән алақиси үзүлгән вә у өзиниң әһвали билән қалған. Йәмән һакимийити йәмән рәисиниң оғли вә туғқанлириниң идарә қилиши билән давам қилмақта икән. Намайишчиларни бастуруш, өлтүрүш ишлири йәнә бурунқидәкла давам қилмақта икән.

Сана шәһиридин муһәммәд абдурразиқ дегән киши2011-йили1-июл күни қатарниң “әл җезирә”телевизийә қанилиға бәргән баянатида мунда дегән:“ һазир йәмәндә ели абдулла салиһниң туғқанлири вә яндашлиридин башқа һечким униң һакимийитини қоғдимайду. Буларниң ичидинму һәр күни онларчә киши намайишчиларға қошулмақта.”

Түркийә чегрисидики сүрийиликләрниң вәзийити

 Лондонда чиқидиған “оттура шәрқ” гезитиниң 2011-йили1-июл санидики хәвиригә көрә, сүрийидин җенини қутқузуш үчүн түркийә чегрисиға қачқанлар шу җайда сүрийә рәиси бәшшар әл әсәдниң һакимийәттин чүшүшини тәләп қилип чоң көләмлик намайиш уюштурған. Уларму бу намайишини“ ахирқи ғәлибә” намайиши дәп атиған. Мундин башқа йәнә сүрийиниң көплигән шәһәрлиридә җүмә намизидин кейин чоң көләмлик намайиш башланған. Түркийә чегрисидикиләр “әл җәзирә” телевизийә қанилиниң мухбириға сүрийә армийисиниң түркийә чегрисиға йеқин җайлардики сүрийә йезилирини оққа тутуп, бәзи йезиларни пүтүнләй көйдүрүп ташлиғанлиқини вә өзлириниң һаятидин әндишә қиливатқанлиқини ейтқан. Бир тәрәптин сүрийә армийиси чегридикиләрни қайтуруп келиш йолида уларни тәһдит қилмақта икән.

Сүрийиликләр сөһбәт гурупписи қуруп чиқти

Ширзад шәйхани дегән кишиниң “оттура шәрқ”гезитиниң 2011-йили1-июл күнидики санида елан қилинған бир мақалисидә мундақ йезилған: “түнүгүн сүрийә пайтәхти дәмәшиқ шәһиридә сүрийә һакимийитигә қарши партийиләр вә җамаәтләр бирлишип, сүрийә ичи вә сиртидики муһим шәхсләрниң иштираки билән “сөһбәт гурупписи” қуруп чиқти. Бу гуруппини қурғучиларниң билдүрүшичә, улар сүрийини һәқиқий демократик дөләт қилип қуруп чиқиш вә ислаһатни тинч йол билән әмәлгә ашуруш йолида бу гуруппини қурған. Улар сүрийә һакимийитиниң мәсилини сөһбәт билән һәл қилиш тәклипини 8 шәрт билән қобул қилидиғанлиқини очуқ җакарлиған. Дәмәшиқтә қурулған “сөһбәт гурупписи” тәрипидин қоюлған мәзкур 8 шәрт болса: “сүрийә һөкүмитиниң намайишчиларға қарши бастурушни дәрһал тохтитиши, намайишчиларни қарилайдиған тәшвиқатлирини тохтитиши, намайиш башланған күнидин бири түрмиләргә қамалғанларниң һәммисини қоюп бериши, намайишчиларға оқ чиқарғанларни җазалаш үчүн мәхсус тәкшүрүш комитети қуруп чиқиши, сүрийиликләрниң тинчлиқ намайишини етирап қилиши, сүрийә қанунидики “сүрийидә мутләқ һакимийәт һакимийәт үстидики тирилиш партийисиниң қолида болиду” дегән 8- маддини әмәлдин қалдуруши, қанунни өзгәртиш арқилиқ ислаһат елип бериш үчүн муәййән вақит тохтитиши ” қатарлиқ шәртләр икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт