Сүрийидин қачқанларниң вәзийити

Бу сәвәбтин сүрийә хәлқи җенини қоғдаш үмиди билән тәрәп-тәрәпләргә қечип қутулуш койиға киргән.

Хәвәрләргә асасланғанда, сүрийигә қошна дөләтләр ичидә түркийиниң сүрийә хәлқигә болған һесдашлиқи алаһидә чоң болған. Түркийә қизил ай җәмийити сүрийидин қечип панаһлиниш үчүн түркийә чеграсиға киргәнләрни қизғин қарши алған. Түркийә һөкүмити панаһланғучиларни чедир, йемәк-ичмәк, дора-дәрмәкләр билән тәминләп кәлгән. Һазирғичә сүрийидин түркийигә панаһлиниш үчүн киргәнләрниң сани 11 миңға йәткән, йәнә сүрийә билән түркийә чеграси еғизида түркийигә кириш үчүн күтүватқанлар сани 10миңдин ашидикән.

Сүрийә армийиси сүрийидин түркийигә өтүш үчүн қачқанларни излап йүрүп бомбардиманлирини давам қилдурмақта икән. Һазирғичә сүрийиниң түркийә чеграсиға йеқин йезилиридин бир қанчиси пүтүнләй бомбардиман қилинған болуп, йезиниң адәмлири өзлириниң җанлирини аран елип қечишқа мәҗбур болған. Йәнә бир тәрәптин сүрийә һөкүмити рәсмий тәшвиқат васитилиридә сүрийидин қечип кәткәнләрни қайтип келишкә чақирип туридикән. Лекин сүрийидики вәһшийликләрдин қечип кәткәнләрдин қайтқини йоқ. Түркийә һөкүмити түркийә чеграсиға кирип болған сүрийиликләрни чоқум қоғдайдиғанлиқини билдүргән.

Сүрийидин қечип чиққанлар қайтишни халимайду

Қатарниң “әл җәзирә” телевизийә қанилиниң мухбири өмәр хәшрәм 21-июн сәйшәнбә күни түркийиниң антакийә шәһиридин бәргән баянатида мундақ деди: “бүгүн түркийиниң антакийә шәһиридики мәхсус чедирларда панаһлиниватқан сүрийиликләр билән сөһбәтләшкинимиздә, уларниң чирайидин вә сөзлиридин үмидсизлик ипадилирини һес қилдуқ. Уларниң сүрийә вәзийити оңшалмайдикән, сүрийигә қайтиш нийити йоқтәк қилиду. Улар сүрийә һөкүмити уларға чирайлиқ вәдиләрни қилип қайтип келишкә чақирған билән интиқам алмай қоймайдиғанлиқини, мундин илгириму һөкүмәтниң вәдә қилғанлириниң бириниңму әмәлгә ашмай кәлгәнликини баян қилишти. Улар йәнә сүрийә рәиси бәшшар әл әсәд һакимийити давам қилипла туридикән, өзлиригә яхшилиқ йоқлуқини билдүрүшти.”

“дуня мусулман өлималар һәйити”сүрийә хәлқигә ярдәм қилишни чақириқ қилди

Қатарниң “әл җәзирә” телевизийә қанилиниң хәвиригә көрә, “дуня ислам өлималар һәйити” сүрийә вәзийити һәққидә мәхсус баянат елан қилип, пүтүн мусулманларни вә ислам әллирини сүрийә хәлқигә җиддий ярдәм қилишқа чақирған. Баянатта мундақ дейилгән:“һазирқи вәзийәттә сүрийә хәлқигә ярдәм қилиш толиму зөрүр болуп қалди. Шуңа барчә ислам әллирини вә мусулманларни сүрийә хәлқигә маддий вә мәниви ярдәм қилишқа чақиримиз. Сүрийә хәлқиниң йоллуқ намайишини қоллаймиз вә сүрийидики қериндашлиримизниң йолини давам қилишини сораймиз.”

Йәнә бир тәрәптин, хәлқара қизил крест җәмийити өзлириниң сүрийидики яридарларни давалаш үчүн вәқә йүз бәргән районларға киришигә сүрийә һөкүмитиниң ахири рухсәт қилғанлиқини, бу рухсәтниң көп кечиккән болсиму йоқтин яхши болғанлиқини билдүрүшкән.