Талибанлар қазақистанни агаһландурмақта

Йеқинда талибан һәрикити тәрәп билдүрүш елан қилип, униңда қазақистанниң афғанистанға әскәр әвәтиш һәққидики қарарини әйиблигән.
Ихтиярий мухбиримиз ойған
2011.05.26
taliban-partilitish-pakistan-305.jpg Талибанларниң пакистанда пәйда қилған партлитиш вәқәси. 2009-Йили 7-декабир.
AFP
Шу мунасивәт билән қазақистан ахбарат васитилиридә нурғун мақалиләр елан қилинмақта.

Қазтаг агентлиқи хәвәрлиридин мәлум болушичә, америка қошма штатлириниң қазақистандики вақитлиқ ишәнчлик вәкили дҗон ордвей а қ ш ға қариғанда афғанистанниң йеқин болуш сәвәбидин мәркизий асия дөләтлириниң талибанлар тәрипидин һуҗумға дучар болушида көпрәк хәвп туғулмақта, дәп билдүргән.

Мәзкур агентлиқта елан қилинған “талибан қазақистанға попоза қилмақта” намлиқ мақалидә ейтилишичә, талибан һәрикити оргини қазақистанниң нато билән афғанистандики бихәтәрликни тәминләш мәқситидә хәлқаралиқ күчләр паалийитигә қатнишиш үчүн тинчлиқ әскирини әвәтиш һәққидики келишимгә қол қоюш нийитиниң барлиқи мунасивити билән билдүрүш тарқатқан. Мәзкур билдүрүштә “натониң афғанистандики урушиға қазақистанниң әскәр әвәтиш һәққидики қарари еғир ақивәтләргә елип келиши мумкин” дейилгән.

Әмди азадлиқ радиосида елан қилинған “талибан агаһландурмақта” намлиқ мақалидә ейтилишичә, қазақистан ташқи ишлар министирлиқи вәкили асқар абдрахманоф өзиниң “қазақистан йеңилиқлири” агентлиқиға бәргән сөһбитидә “бу әлдики бихәтәрликни капаләткә игә қилиш вә тинч һаят муһитини яритиш” бойичә хәлқаралиқ һәрикәтләргә ярдәмлишиш мәқситидә афғанистанға төрт офитсерни әвәтишниң көздә тутулуватқанлиқини хәвәр қилған икән.

Ташқи ишлар министирлиқи вәкилиниң билдүрүшичә, қазақистан нато билән түзгән келишим бойичә, кабул шәһиригә орунлашқан хәлқаралиқ күчләр тәркибигә төрт қазақистанлиқ офитсерни әвәтишни пиланлиған. У шундақла афғанистандики хәлқаралиқ иттипаққа 47 мәмликәтниң қатнашқанлиқини, улардин 19 иниң натоға, алтисиниң ислам конферансийиси тәшкилатиға әза икәнликини билдүргән.

Мәзкур мақалидә, бир қатар қазақистанлиқ анализчиларниңму бу вәқәгә болған қариши берилгән болуп, қазақистандики тонулған анализчи досим сәтпайеф мундақ дегән: “қазақистанниң һазир а қ ш вә натониң афғанистандики һәрбий шерики сүпитидә қатнишишқа һазирлиниши, әлвәттә, җумһурийәттики террорлуқ хәвп-хәтәрни күчәйтиду. Гәп талибан һәрикитиниң қазақистан йеридә ундақ яки бундақ террорлуқ һәрикәтлирини әмәлгә ашурушиниң мумкин икәнликидә әмәс. Сәвәби мәркизий асияда әлқаидә вә талибан һәрикити билән биваситә яки қошумчә бағлинишқа игә болған радикал гуруппилар бардур.”

У, талибан тәрипидин елан қилинған билдүрүшни инкар қилишқа болмайдиғанлиқини оттуриға қойған. Мақалидә шундақла қазақистанниң биринчи президенти фонди йенидики дуня иқтисади вә сиясити институти мудири султан акимбекофниң қариши мисал кәлтүрүлгән. У талибан һәрикитиниң билдүрүши мунасивити билән қазақистан үчүн һечқандақ бир хәвпни көрмәйватқанлиқини билдүргән.

Қазақистанда чиқидиған “время” гезитидә елан қилинған “талибанлар һәзиллишишни яхши көрмәйду” намлиқ мақалидә қазақистан мусулманлири иттипақиниң башлиқи мурат телибекофниң талибан һәрикити вәкиллирини астаниға тәклип қилип, улар билән афғанистандики тоқунушни һәл қилиш бойичә музакириләр башлашни тәклип қилғанлиқи һәққидә ейтилған. У шәхсән өзиниң афғанистанға әскәр елип кириш қарарини қоллимайдиғанлиқини, әтики күндә вәзийәтниң қандақ болидиғанлиқини һечкимниң билмәйдиғанлиқини, талибанлар билән афғанистандики уруш һәрикәтлирини тохтитиш тоғрилиқ музакириләр елип беришниң көпрәк нәтиҗә беридиғанлиқини илгири сүргән.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.